Чаллы шәһәренең мэриясе сайтында хәбәр ителгәнчә, шәһәрдә татар телен өйрәнүгә атнага 3 сәгать аерылган, урыс теленә исә - 6-8 сәгать. Бүгенге көндә уку планнары федераль белем бирү стандартларына туры китерелгән, диелә.
Чаллы башкарма комитеты җитәкчесе урынбасары Рамил Хәлимов матбугат очрашуында ата-аналарның 68,9 проценты "Ана теле" дәресләре кысаларында татар телен өйрәнүне сайлаганын белдерде. Татар телен өйрәнүдән баш тартучылар исә Русия мәгариф министрлыгы тәкъдим иткән "Риторика" дәресен өйрәнәчәк.
Барлык сыйныфларда балалар "ана теле" дәресләре сәгатендә 3 төркемгә бүленеп укый: татар телен яхшы белүчеләр, татар телен начар белүчеләр һәм риторика дәресенә йөрүчеләр.
Хәлимов сүзләренчә, Чаллыдагы 539 татар телен укытучысының 12се эштән чыгарылган, аларның 6сы пенсия яшендә.
29 ноябрь иртәсендә Татарстан Дәүләт шурасы республика мәктәпләрендә татар телен укыту мәсьәләсен караячак, дип көтелә.
Безнең Telegram каналына язылыгыз! Иң кызыклы хәбәрләрне беренче булып укыгыз.
