Русиянең Тикшерү комитеты Пермь урамындагы атыш белән бәйле рәвештә җинаять эшен ачкан. "4 декабрь көнне иртән 50 яшьлек Пермь кешесе үз фатирында мылтыктан ут ачкан. Аннары ул урамга чыгып узып баручыларга ата башлаган. Аңа карата Русия Җинаять кодексының нигезендә җинаять эше кузгатылды”, дип хәбәр итә Русия Тикшерү комитетының Пермь крае идарәсе матбугат хезмәте.
Җинаять кылуда шикләнелгән ир-ат элек тә хөкем ителгән. Атышны ул исерек хәлдә ясаган. Шуның өстенә, үзендә ау мылтыгы тотарга рөхсәте булмаган.
Атыш нәтиҗәсендә бер хатын-кыз үлгән, бер кеше яраланган. Тән җәрәхәтләре алучыларның тагын берсе – Росгвардиянең җинаятьчене тоту төркеменең машина йөртүчесе. Ул автомобиль эчендә утырган килеш ут астына эләккән.
