Accessibility links

Кайнар хәбәр

Google Translate тәрҗемәчесенә татар теле өстәлгән


Якын арада сайтта барлык теләүчеләр татар теленә һәм татар теленнән тәрҗемә ясый алачак.

Google Translate үз тәрҗемәче системына татар телен өстәгән. Бу хакта рәсми блогта белдерелә. Сайтта әлегә татар теле күренмәсә дә, ул якын арада тәрҗемә системына өстәлер дип хәбәр ителә.

Google Translate-та тәрҗемә мисалы
Google Translate-та тәрҗемә мисалы

Татар теленнән тыш тәрҗемә системына төрекмән, уйгыр, киньяруанда һәм одия телләре өстәлгән. Google сүзләренчә, бу телләрдә җәмгысе 75 миллион кеше сөйләшә. Хәзерге вакытта Google Translate хезмәтендә 108 тел бар.

Яңа телләрне бүгеннән үк Google Translate кулланучыларының бер проценты күрә алачак, якын көннәрдә аларның саны арта барачак. Translate текст тәрҗемәсеннән тыш яңа биш тел өчен веб-сайтлар тәрҗемәсен дә тәкъдим итәчәк. Татар, уйгыр һәм киньяруанда телләре өчен виртуаль клавиатура да тәкъдим ителә.

Google хәбәр иткәнчә, яңа телләр өстәүнең авырлыгы – әлеге телләрдә интернетта контент аз булуы. Google яңа өстәлгән телләрне белүчеләрне тәрҗемә төркеменә кушылып, системны камилләштерүдә катнашырга чакыра.

Моңа кадәр аерым активистлар тарафыннан Google Translate хезмәтенә татар телен өстәү тырышлыкларын ясаган иде. Google Translate-та волонтерлар көче белән тәрҗемә эшләре барды. Милли җанлы яшьләр татар теленә тәрҗемәләрне түләүсез башкарды. Дөнья татар яшьләре форумы бу проектны дәүләт оешмаларына да тәкъдим итеп карады, ләкин әлегә кадәр дәүләттән ярдәм булмады.

Google Translate-ны татарчага тәрҗемә итүче активистларның берсе Ирек Хаҗиев Азатлыкка "яңа телне өстәү бик тиз эш түгел, чөнки тел өстәлсен өчен Google базасында 1 миллион тәрҗемә җыелырга тиеш", дип белдергән иде.

Соңгы тапкыр Google Translate системына яңа телләр 2016 елда өстәлгән иде. Ул вакытта тәрҗемә өчен 13 тел өстәлде, алар арасында кыргыз, көрд кебек телләр.

Яндексның тәрҗемә хезмәтенә татар теле 2015 елда өстәлде.

фикерләр (3)

бу форум ябык
XS
SM
MD
LG