Коронавирус куркынычы булу сәбәпле, Татарстан мөфтияте мөселманнарның мәчетләрдә күмәк намазда булу вакытын кыскартырга киңәш бирә. Бу турыда Татарстан Диния наззәрәтенең сайтында дөнья күргән документта әйтелә.
“Имамнарга киңәшләр: азан һәм икамәт арасында аралыкны мөмкин булганча кыскартырга; Ураза, Корбан бәйрәмнәре вакытында бәйрәм хөтбәсе вакытын кыскартырга; мөселманнарга эпидемия вакытында үз-үзләрен ничек тотарга икәнен аңлатырга” диелгән документта.
Мөселманнарга Татарстан мөфтияте коронавирус таралган илләргә бармаска киңәш итә. Шулай ук тән чисталыгын кайгыртырга, ютәлләгәндә һәм төчкергәндә авызларын капларга, бүлмәдәге һаваны вакыт-вакыт җилләтеп торырга, якыннары сәламәтлеге өчен җаваплы булырга, Ходайдан бөтен мөселманнарның гөнаһын кичерүен һәм иминлек сорарга, ә инде авыру билгеләре сизгән очракта кичекмәстән табибларга мөрәҗәгать итәргә, кеше күп җыелган урыннарга бармаска киңәш ителә.
