Татарстанда үзизоляция тәртибе көннәрендә ата-аналардан балалар бакчасы өчен түләү алмаячаклар. Бакчаларда абүнә түләүләрен алмау турыда карар кабул итүне Татарстан президенты Рөстәм Миңнеханов республика хөкүмәтенә йөкләгән. Шундый карар кабул ителәчәге турында Миңнеханов үзенең Instagram-дагы сәхифәсендә хәбәр итте.
Бу мәгълүматны Татарстан хөкүмәтенең коронавируска каршы көрәш мәсьәләләренә багышланган утырышында да расладылар.
“Миңа ата-аналардан мөрәҗәгатьләр бик күп килә. Хөкүмәткә йөкләмә бирдем – эшләми торган көннәрдә балалар бакчаларында абүнә түләүләрен алмаска!” дип язган Миңнеханов. Аның сүзләренчә, бу көннәр өчен алдан түләп куйган кешеләрнең акчасын яңадан санаячаклар.
Татарстан вице-премьеры Ләйлә Фазлыева уздырган брифингта карантин чараларының кайберләренә кагылган үтенечләр дә булды. Кешеләргә урамда булырга рөхсәт ителгән вакытны 1 сәгатьтән ике сәгатькә кадәр озайтуны, газета сатучы нокталар эшләвен, һәм кече һәм урта бизнеска ярдәм чаралары булдыруны сорадылар. Фазлыева бу сорауларга бер сәгать эчендә җавап әзерләргә вәгъдә итте.
