Accessibility links

Кайнар хәбәр

Флорида татарлары татар рәссамнары сурәтләрен кабатлады


Резеда Мойта (Анастасия Шамова-Бузунеева рәсеме)

Коронавирус пандемиясенә бәйле изоляция чорында Флорида татарларының татар рәссамнары иҗатына косплей проекты барлыкка килде. Ул тиз арада интернетта таралып та өлгерде.

Коронавирус аркасында төрле илләрдә изоляция режимы кертелгән чорда онлайн тормыш алга чыкты: социаль челтәрләрдә төрле яңа челленджлар, марафоннар, флешмоблар барлыкка килде. Бу иҗади акцияләр арасында иң киң таралганы дип "Изоизоляция" флешмобын атарга була: сәнгать әсәрләренә косплей ясау (кабатлап күрсәтү) идеясе тиз арада популярлашты, өйдә утырырга мәҗбүр булган төрле ил кешеләре рәсем сәнгатенең танылган шедеврларын кул астында булган нәрсәләрне кулланып кабатлап күрсәтергә кереште.

Телевидениедә һәм радиода тапшырулар алып баручы, блогер Айсылу Лерон Instagram-ында да чагылды бу челленжд — ул апрель аенда улы Нурихан белән Хаҗиморат Казаковның "Бәләкәй Апуш" сурәтенә косплей урнаштырды.

Шулай ук изоляция чорында Флорида татарларының татар рәссамнары иҗатына косплей проекты барлыкка килде. Азатлык флешмобны оештыручы Диләрә Галиева белән әлеге проект, милли сәнгать турында сөйләште.

Диләрә, бу идея каян барлыкка килде?

Диләрә Галиева
Диләрә Галиева

— Мин үзем IT тармагында эшлим. Безнең эш күбрәк програмлауга, алгоритмнарга юнәлгән. Техник эш күп булгангамы, мине соңгы вакытта иҗатка тартты, карантин вакытында бик күп иҗади төркемнәрне карап утырдым, шул чакта Facebook сайтындагы "Изоизоляция" төркеменә тап булдым. Проект миңа бик ошады — кешеләр үзләренә ошаган рәсемне алалар да, кул астындагы әйберләр белән аны сурәтләп күрсәтәләр.

Изоляция чорында тагын башка челленжларда катнаштыгызмы?

— Без изоляция чорында милли ашлар белән бер челленжд ясаган идек инде, ашарга әзерләү процессы безнең үзебезгә ошады, ә интернетка куйгач, башкалар да бик ошатты. Безнең кызлар белән аерым чат бар, без бик актив аралашабыз, Роза Харисова "Әйдәгез, тагын бер челленжд ясыйк", диде, мин шушы рәсемнәрне кабатлау идеясен тәкъдим иттем. Римма Минһаҗева "Татарча булсын", диде. Безнең кызлар, нинди идея булса да, бик җиңел күтәрелә, милли сәнгать темасын бик ярата. Шуңа бу проектны оештыру бик җиңел һәм күңелле булды.

— Рәсемнәрне кем сайлады?

— Мин интернеттан татар темасына кагылган яки татар рәссамнары төшергән рәсемнәрне таптым, кызларга тәкъдим итә тордым. Кемдер шуларны ошатып сайлап алды, кемдер үзе эзләп тапты. Мин кызларны үземә кунакка чакырдым, кызлар өйләреннән милли ризыклар пешереп алып килде, без аларны Резеда башкарган косплей өчен кулландык.

Соңыннан чәй эчеп, җырлап-биеп алдык, тәм-томнарны ашап туйгач, тагын өч рәсемне кабатладык — бер җыелуда дүрт рәсемгә косплей ясап өлгердек.

Дөньядагы башка татарларның да бу флешмобка кушылуын теләр идегезме?

Башка татарлар кушылса, тагын да яхшырак булыр иде. Башка штатлардан, илләрдән кушылсалар, без бик шат булыр идек. Әлбәттә, һәркемнең үз дөнья мәшәкате булуы аңлашыла, рәсемне сайлап алу өчен вакыт, әсбаплар табарга кирәк. Бар кешенең калфак-камзулы юк. Ләкин кушылырга теләгән кеше җаен табачак, дип уйлыйм. Бик шәп булыр иде.

фикерләр (2)

XS
SM
MD
LG