Accessibility links

Кайнар хәбәр

"Акыл фабрикасы" форумында IT һәм этномәдәни проектларны таныту ысулларына өйрәтәчәкләр


"Акыл фабрикасы" чарасы (архив фотосы)

12-14 ноябрьдә Казанда республикакүләм "Акыл фабрикасы" белем бирү форумы узачак. "Акыл фабрикасы" проектының мондый зур күләмле чарасы беренче тапкыр оештырыла.

Форумда катнашучылар дүрт модуль нигезендә эшләячәк: "IT һәм татар проектлары", "Заманча мәгариф", "Маркетинг һәм этномәдәни проектларны таныту", "Мәдәният һәм урбанистика".

"Ачык университет" кураторы Зөһрә Вилданова Азатлыкка сөйләгәнчә, күләмле форум уздыру теләге күптән туган булган. "Безнең команданың башында төрле идеяләр йөри иде. Мәсәлән, IT-белгече Райнур Хәсәновның күптән татар IT-белгечләрен җыясы килә иде, мәгариф мәйданчыгын эшләгән Алия Минһаҗева "Талантлар университеты" белән бергә мәктәп укучылары һәм студентлар өчен актуаль сорауларга җавап бирә торган мәйданчык эшлиселәре килде – аларны һөнәр сайлау, БДИ тапшыру, эш табу мәсьәләләре һәм башкалар кызыксындыра. Урбанистика юнәлешендә районнардан яшьләрне җыеп, аларны укытып аласы да килә иде. "Шәһәр киңлекләрен мәдәни програмлау" дигән програмны без Әнҗе Дусаева белән берлектә эшлибез", диде Зөһрә Вилданова.

Форумда өч көн дәвамында дүрт мәйданчык эшләячәк. Алар бер-берсе белән бәйле дә, бәйле дә түгел, һәрберсенең үз аудиториясе булачак, дип аңлатты Вилданова. "Бөтен дүрт мәйданчыкта да катнашу мәҗбүри түгел, һәрберсендә аерым укыту була", диде ул.

Форумда IT-белгечләр, филологлар, маркетологлар, креатив индустрия вәкилләре, җәмәгать эшлеклеләре, укучылар һәм студентлар катнаша ала.

Форумда күптөрле темалар тикшереләчәк. Алар арасында: татар телле IT-проектлар, IT һәм маркетинг, IT өлкәсендә филологлар роле, туризм өлкәсендә IT роле, Татарстанда IT-кластерлар булдыру, эш эзләү, чит илләрдәге уку йортларына керү, БДИ, киңлекләрне мәдәни програмлау, хәзерге мәдәният, театрлар, Татарстан республикасында яшьләр үзәкләре, шәһәр буйлап экскурсияләр уздыру темалары бар.

"Ачык Университет" белем бирү форумы Татарстанда быел игълан ителгән Туган телләр елына багышлана. Чараны Дөнья татар яшьләре форумы уздыра.

"Ачык университет"

"Ачык университет" сайты – Дөнья татар яшьләре форумы проекты. Ул әлеге оешма уздырып килгән "Акыл фабрикасы" курсларыннан үсеп чыккан. 2019 ел башыннан "Ачык университет"та төрле темаларга онлайн курслар уза башлады. Әлеге университет төрле темаларга татарча дәвамлы лекцияләр тәкъдим итә, аларны сайтта теркәлеп онлайн карап була. Ахырдан курсларны узу турында таныклык алу мөмкинлеге бар.

🛑 Әгәр сезнең провайдер безнең сайтны томалап куйса, аптырамагыз, телефон йә планшетыгызга Азатлыкның RFE/RL әсбабын йөкләгез (App Store һәм Google Play кибетләрендә бушлай) һәм татар телен сайлагыз. Без анда да ничек бар, шулай!
🌐 Шулай ук, безнең Telegram каналына кушылырга онытмагыз!

фикерләр (2)

бу форум ябык
XS
SM
MD
LG