10 сентябрь, шимбә көнне Чарлз III рәсми рәвештә Британия патшасы дип игълан ителәчәк, дип яза Times. Алданрак вакыйганың бүген, 9 сентябрьдә булачагы хәбәр ителгән иде.
Бүген яңа патша һәм патшабикә-консорт Камилла Шотландиядәге Балморал сараеннан кайтачак диелә, кичә анда 96 яшендә британ патшабикәсе Елизавета II вафат булды. Көннең икенче яртысында патша күптән түгел Британия премьер-министры вазифасына билгеләнгән Лиз Трасс белән беренче очрашуын уздырырга мөмкин.
Бүген 18:00 сәгатьтә (Казан вакыты белән кичке сигездә) Чарлз III–нең телевизордан алдан яздырылган мөрәҗәгате чыгарга тиеш.
Лондоннның Гайд паркында патшаның ат артиллериясе Елизавета II яшәгән гомернең һәр елы хөрмәтенә берешәр мәртәбә салют аттырачак.
10 сентябрьдә 10:00 сәгатьтә (Казан вакыты белән сәгать көндезге 12) тәхет дәвамчысы шурасы утырышы узачак, анда яңа суверен игълан ителәчәк диелә.
Британ патшабикәсе Елизавета II: 96 еллык гомер һәм 70 еллык тәхет
8 сентябрьдә 96 яшендә британ патшабикәсе Елизавета II вафат булды.
Патшабикәнең үлеме бөтен дөньяны тетрәндерде. Аерым алганда Британия, Һиндстан, Пакстан, Канада, Италия, Чехия премьер-министрлары, БМО баш сәркатибе Антониу Гутерриш, Европа шурасы президенты Шарль Мишель, Нидерланд патшасы Виллем-Александр, Германия, Франция, Украина президентлары кайгы уртаклашты.
Британия белән ул 1952 елдан бирле 70 ел идарә итте. Канун нигезендә тәхетне аның улы 73 яшьлек шаһзадә Чарлз алачак. Берләшкән патшалыкның монархы итеп игълан ителгәч, ул үзенә Чарлз III исеме сайлады. Британиядә 10 көнлек матәм игълан ителә.
Матәм беткәннән соң, Британиядә Чарлзга таҗ кидерү рәсми тантанасын оештыру башланачак. Моңа әзерлек бер елдан артыкка сузылырга мөмкин. Патшабикә Елизавета II-гә әтисе үлеменнән һәм тәхеткә утырганнан соң ел ярым вакыт узгач кына таҗ кидерделәр.
2016 елда, британ патшабикәсе Елизавета II-нең таҗ киюенә 63 ел тулуы уңаеннан Азатлык британ тәхетендә иң озак утыручы патшабикәнең тормышына кыскача күзәтү тәкъдим иткән иде.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
