Русия хакимиятләре Бакчасарайдагы Хан сараендагы Кырым Гәрәй ханның Алтын бүлмәсен юк итте, дип белдерделәр Украина президентының Кырым автоном республикасындагы вәкиллеге матбугат хезмәтендә.
Эшчеләр ЮНЕСКОның Дөнья мирасы исемлегендәге тарихи һәйкәлнең түбәсен һәм витражларын сүткән диелә.
"Асаба кырымтатар халкының күренекле архитектура урынын яңа тарихи элементлы объектка әйләндерәләр. Бу - оккупантларның Кырымдагы Русиянеке булмаган теләсә нинди әйберне, шул исәптән башка халыкларның тарихи һәйкәлләрен юк итү концепциясе. Оккупацион түрәләр Кырымда Русияне хәтерләткән әйберләр генә калсын өчен барысын да эшләргә тырыша", диелә хәбәрдә.
Украина президенты вәкиллегендә Русия хакимиятләренең тарихи һәйкәлне юк итүен туктатырга чакыралар. Шулай ук халыкара җәмәгатьчелектән Русиягә басымны көчәйтүне сорыйлар, бу - "асаба кырымтатар халкының архитектур мирасындагы иң күренекле объектның" җимерелүен булдырмас өчен кирәк диелә.
"Оккупантлар Бакчасарайдагы хан сараен юк итә. Без ЮНЕСКОны тагын бер кат үзенең даими әгъзасы кылган гамәлләргә игътибар итәргә чакырабыз", дип язды үзенең Telegram-каналында Украина мәдәният министры Александр Ткаченко.
Күптән җүгел Азатлык Бакчасарайдагы Хан сараенда җәнҗаллы реставрация эшләре турында фотогалерея әзерләгән иде:
Бакчасарайдагы Хан сараенда җәнҗаллы реставрация эшләре
- Кырым ярымутравын аннексияләгәннән соң, Русия андагы бөтен тарихи объектларга кагылышлы мәсьәләләрне хәл итүне дә үзенә алды. Украина бу һәйкәлләрнең украин халкыныкы булуын әйтеп килә һәм аларны ЮНЕСКО яклавы астына алуларын сорый.
- Кырымның Бакчасарай шәһәрендәге мәшһүр Хан сараен реставрацияләү ике елга сузылган килештерү эшләреннән соң 2018 елда ук башланган иде. Кырымтатар активистлары һәм тарихчылары шунда ук диярлек чаң кага башлады, чөнки реставрация барышында борынгы материаллар заманчаларына алыштырыла, коммуникацияләрне реконструкцияләгәндә технологияләр бозыла һәм башка җитешсезлекләр дә бар.
- Нәтиҗәдә былтыргы көчле яңгырлардан соң, бу ел башында сарайның диварында ярыклар барлыкка килде. Кырымны аннексияләгән Русия хакимияте прокуратурасы Кырым мәдәният министрлыгына бу җитешсезлекләрне төзәтергә кушып хат тапшырды. Соңрак Бакчасарай районы прокуратурасы тиешле түрәләргә карата җинаять эше ачылуын белдерде.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!