"20 ел авылга газ кертү өчен көрәшәбез". Урал артында газ кермәгән авыллар бар

Башкортстанның Әбҗәлил районы Аслай авылы халкы газсыз һәм юлсыз интегә. 20 елдан артык алар төрле түрәләр ишеген таптый, хатлар яза.

Гыйнварда тагын бер хат язганнар. Бу юлы Башкортстан башлыгы Радий Хәбиров исеменә.

"Менә 20 ел инде район җитәкчелеге ел саен безгә газ һәм юл вәгъдә итә, әмма алар һаман юк. Газ торбасына тоташу юлы 1 км гына калды, 20 км юлга асфальт кирәк. Ләкин проблем хәл ителми, чөнки "... республика бюджетыннан бүленгән акча үзләштерелгән... ә юл ремонтына акча бүлү темасы башка зур объектларны тәмамлаганнан соң каралачак". Район башлыгы урынбасары шулай язды", диелгән бу хатта.

Бу пролемнарны чишү "махсус хәрби операциядә" катнашучылар ата-аналары проблемнарын хәл итүдә дә ярдәм итәр иде дип тә өстәгәннәр. Украинадагы сугыш темасы Радий Хәбиров өчен мөһимнәрдән санала, ул әледән-әле Русия һөҗүмен яклап чыгыш ясый.

Шушы авылда яшәүче Гүзәл Гайсина өченче төркем инвалид, күпчелек өйдә генә утыра. "Газ һәм юл мәсьәләсе белән авыл мулласы Ислам Хафизов йөри. Хәбировка хат яздык, имза җыйдык. Газсыз авыр, утын ягабыз. Елына ике машина утын сатып алам, аның берсе 10 мең сумга төшә. 2 мең сумга берәрсен яллап ярдырам. Өч-дүрт йорт кына электр белән җылытыла. Юл булмау да бик авыр. Авылда эш юк, яшьләр вахта белән эшләп йөри. Зарланмыйм инде, Аллаһка шөкер. Пенсияне җиткереп яшәргә тырышам", дип сөйләде Гүзәл ханым Азатлыкка.

Баим авыл биләмәсе шурасы депутаты Исрафил Җансәетов быел республика башлыгына ике тапкыр мөрәҗәгать иткән. "Иң беренче чиратта Баимнан Аслайга һәм Учалы районының Казаккул авылына кадәр юлга асфальт салу турында сорыйбыз, эш алып барабыз. 2018 елда 1200 имза җыеп Русия президенты Владимир Путинга да мөрәҗәгать иткән идем. Шуннан соң Радий Хәбиров безнең авылга килде, Ташбулат авылыннан Баимга кадәр юл салынды. Аллла бирсә, булыр", диде Җансәетов Азатлыкка.

Радий Хәбиров посты астында Аслай авылы мулласы Ислам Хафизов газ һәм юл сорап язды. Аңа Әбҗәлил районы хакимияте вәкиле Азалия Галимова җавап бирде. Аслай эчендәге юллар Баим авыл биләмәсе балансында, "район бюджеты исәбенә аларны ремонтлау әлеге вакытта мөмкин түгел" дип язды ул. "Башкортстанның транспорт системы програмына" өстәмә акча бүленсә, бу юлларны ремонтлауны шул програмга кертү мәсьәләсе каралыр. Юлларны норматив кысаларда тоту өчен 2022 елның июлендә һәм ноябрендә авылга керү юлы грейдер белән тигезләнде", диелгән хакимият җавабында.

Аслайга газ кертүгә килгәндә, район хакимияте авылга кадәр газүткәргечнең проект эшләрен башкаруга 2024-2025 елларда гариза бирәчәк диелә.

Аслайга газ кертү мәсьәләсе Башкортстанда ул вакытта президент булган Рөстәм Хәмитов чорында күтәрелә башлый. 2011 елда ул әлеге авылга килә һәм газ вәгъдә итә. Шуннан бирле бу вәгъдәләр сүздә генә кала. 2021-2025 елларга Башкортстанда газ кертү програмында Аслай авылы юк.

Гомумән, республикада газ булмауга бер Әбҗәлил районы халкы гына зарланмый. Мондый проблем аеруча Урал аръягында кискен тора.

Шул ук вакытта кечкенә авылларга газ кертү мәсьәләсе бөтенләй хәл ителмәскә дә мөмкин. Чөнки Русия монополисты "Газпром" ширкәте кеше әз яшәгән авылларга газүткәргеч сузуны "максатка ярашлы" дип тапмый. Белорет районы Верхенбельский авылына газ кертү турында сораган Альбина Сальниковага район хакимиятеннән шундыйрак җавап килгән.

"Газпром" газ торбасы төзегәндә авылда кеше саны, социаль объектлар һәм оешмалар - киләчәктә ихтимал кулланучылар санын бәяли. Район хакимияте бөтен авылларга да газ кертү схемасына заказ бирде. 2025 елга кадәр планнарга Шигай авылына таба торба сузу, Белорет-Тукан газүткәргечен тапышру кергән. Вакыт узгач Верхенбельский авылының дә перспективалары булыр дип өметләнәбез", дип язган хакимият вәкиле Елена Исламова.

🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!