Русиядә биофабрикаларның булмавы сәбәпле, сөт ашамлыклары җитештерү тулысынча чит илдән кертелгән оеткыларга бәйле. Бу хакта РБК-га "АгриВолга" холдингына нигез салучы Сергей Бачин белдергән. Ул әлеге тармак 80-90нчы елларда "җимерелде" дигән һәм аны яңадан булдырырга кирәк дип искәрткән.
"Бәлки кулланучылар аңлап бетермидер, әмма әгәр Европа сөт оеткыларына чикләүләр кертсә, Русиядә каймак булмаячак. Без аны җитештерә алмаячакбыз. Чөнки тоталь бәйлелек турында сүз бара", дигән ул.
Аның әйтүенчә, Русиядә кулланылучы оеткыларның 90 процентын чит илдән кертәләр, илдә аларны җитештерү өчен биофабрикалар юк.
"Угличта тәҗрибә буларак эшләүче биофабрика һәм кечкенә лабораторияләр бар, алар нәрсәдер эшләргә тырыша. Әмма ихтыяҗның 10 процентыннан да артыгын капламый", дигән белгеч.
Былтыр 24 февральдә Русия Украинага бәреп керде. Моңа җавап итеп, Көнбатыш илләре Русиягә күптөрле чикләүләр кертте. Алар түрәләрнең генә түгел, гади халыкның тормышына да нык тәэсир итә.
Күптән түгел Русиядә йогурт җитештерүчеләр куертучы матдә - модификацияләнгән крахмалларның җитмәү куркынычы барлыгын әйтте. Русиягә каршы санкцияләр кертелгәч, аларны Европадан кайтарта алмый башлаганнар. Мондый крахмалларга алмаш табуы авыр диелә, шул сәбәпле Русиядә десертлар һәм йогуртлар җитештерү кимергә мөмкин.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
Форум