Үзәк бүлге хәрби мәхкәмәсе Башкортстанның Миякә районы Әнәс авылында туган 53 яшьлек Җәлил Садыйковны "интернет кулланып, террорчылыкны аклау"да (Җинаять кодексының 205.2 маддәсе, 2нче өлеше) гаепле дип тапкан.
Бу хакта Башкортстан ФСБсына сылтама белән Коммерсантъ хәбәр итә. Иргә 200 мең сум штраф салганнар.
Куәт оешмалары вәкилләре ачыклавынча, 2020 елда Җәлил Садыйков "ВКонтакте"дагы төркемдә фикер калдырган, анда ул Чечня республикасында 2000 елда Шамил Басаев һәм Әмир Хәттаб җитәкчелек иткән "канунсыз кораллы төркемнәрнең һәм банда әгъзаларының җинаятьчел гамәлләрен" аклаган.
Мәхкәмә утырышында ир гаебен тулысынча таныган диелә хәбәрдә.
- 2000 елның 29 февралендә Чечняда Улус-Керт авылы янында Басаев һәм Хәттаб отряды 76нчы Псков дивизиясе десантчыларына һөҗүм итә. Нәтиҗәдә, 84 хәрбинең гомере өзелә, 4 кеше яралана.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
Форум