"Печән базары" елдан-ел камилләшә, чаралар масштабы киңәя. 26 августта Казанның Кабан күле буенда узган быелгы програмда ярминкә, фотоаланнар, экскурсияләр, лекторий, чәй аланы белән фудкорт, күмәк бию остаханәсе, балалар мәйданчыгы һәм бу ыгы-зыгыдан арыганнарга медитациягә кадәр оештырылды. Тинчурин театры актерлары һәм “Тәрикәт” дуэты Сәхибҗамал Гыйззәтуллина-Волжская, Зәһидә Тинчурина, Шәриф Камал, Рабит Батулла, Гаяз Исхакый истәлекләрен укыды. Кичен Кабан буенда Төркия татарлары турында концерт күрсәтелде, Айдар Ниязов җитәкчелегендә милли музыка оркестры чыгыш ясады.
"Печән базары" вакыйгасы үзе бер бәйрәмгә әйләнергә өлгерде — бирегә килүчеләрнең бер-берсен бәйрәм белән котлавы ешрак ишетелә. Бирегә милли бизәкле киемнәр, һичьюгы алка яки брошь тагып килү дә үзенә күрә бер гадәт буларак формалашты. Тик узган елгыдан аермалы буларак, быелгы "Печән базары"нда Татарстан әләмнәре генә күренмәде.
Әлеге фестиваль 2013 елдан бирле үткәрелә, ул дизайнер, шагыйрь, музыкант, кулинар, галим, хореограф, кинорежиссерларны берләштерә, аларның иҗат җимешләрен шәһәр халкына җиткерә, татар мәдәниятен популярлаштыра. Быелгы "Печән базары"н Татар конгрессы һәм Татарстан мәдәният министрлыгы ярдәмендә Дөнья татар яшьләре форумы оештырды.
Быелгы бәяләргә килгәндә, милли бизәкле күн букчалар — 5-10 мең сумнан, чигешле спорт костюмнары — 4900-6900 сумнан, алкалар, материалына карап — 1500-7000 сумнан, милли орнаментлы яулыклар 900-1500 сумнан сатылды.
Үз аягыңа, заказ белән, милли чигешле күн чүәкләрне — 4500-5000 сумга, лоферларны — 7500 сумга, итекләрне 25-35 мең сумга тектерергә мөмкин.
Фудкортта ассортимент бик ярлы булды. Шуңадырмы халык хәләл һот-догларны чират торып алды. Аның да берсе казылык хакына җитә язган — 300 сум тора.
Татарча шоперларны күп кеше яратып алды, аларны 900-1000 сумга саттылар.
Милли бизәкле футболкалар 1500-2000 сум тора. Татарстан гербы төшерелгән "Алга" брендлы футболкалар 1000 сумнан сатылды.
