Стәрлетамак шәһәренең сәнәгать мәйданына пилостыз очкычлар һөҗүм иткән

15 апрельдә Башкортстанның Стәрлетамак шәһәрендәге сәнәгать мәйданына пилотсыз окычлар һөҗүме ясалган.

Башкортстан башлыгы Радий Хәбиров сүзләренә караганда, алар сәнәгать мәйданы күгендә бәреп төшерелгән, калдыклары бер корылма өстенә төшкән һәм янгын чыккан.

Нинди корылма икәнен ул әйтмәде.

Supernova+ телеграм-каналы хәбәр итүенчә, һөҗүм Стәрлетамак нефть-химия ширкәтенә ясалган. Геолокацияне тикшергән Astra басмасы әлеге ширкәтнең "Синтез Каучук" корылмасына ясалган дигән нәтиҗәгә килгән.

"Стәрлетамак нефть-химия заводы" (СНХЗ) — Стәрлетамактагы эре нефть-химия ширкәте. Ул синтетик каучук, фенол нигезендәге антиоксидантлар (шул исәптән "Агидол"), ягулык компонентлары (авиация бензины да керә), шулай ук төрле химик өстәмәләр җитештерә.

Башкортстанның нефть һәм газ эшкәртү белән бәйле ширкәтләренә дрон һөҗүмнәре әледән-әле булып тора.

Былтыр ноябрьдә Стәрлетамак нефть-химия заводының (СНХЗ) су чистарту цехында шартлау булганнан соң бинаның бер өлеше җимерелгән иде. Хәбиров дрон һөҗүме турында белдерде.

🛑 Русиядә Азатлык сайты томаланды, нишләргә?Безнең кулланма.
🌐 Безнең Telegram каналына да кушылырга онытмагыз!