Accessibility links

Кайнар хәбәр

Tatnet: Ali Aqış millättäşlärne internet aşa qotlıy


Yaña yıl bäyräme häm 10 könlek yallar internetqa ta üz tä’siren yasıy. Keşelär yal itä, forumnarda tınlıq küzätelä. Ämma, «Tatarskaya gazeta»nıñ forum bülegendä ber qızıqlı xäbär kürende. Törkiädä yäşäwçe tatar jurnalistı Säğit Häyri, ölkän buyın wäkile, jurnalist häm cämäğät eşleklese, Tatar Ligasınıñ maqtawlı räise Ali Aqışnıñ Yaña yıl häm Qorban bäyräme belän qotlawı belän tanışırğa täqdim itte. http://www.yuldash.com/tg/index.php?id=14288&q=mes

Qotlaw video formatta bulıp çıqtı. Anı, kompyuterığızğa suırıp alıp, tıñlarğa täqdim itelde. Tasmada kürsätelgänçä, Ali Aqış, tübätäy, kostyum kigän. Östäl yanına utırğan, käğäzdän, möräcäğäten uqıy. Anda ul milli zıyalılarnı islam, millätne üsterügä izu-qısularğa qarşı köräş alıp barunı däwam itärgä öndi http://www.4shared.com/file/654634/ea19d5fe/Ali_Akish-qotlaw.html

Törkiädä yäşäwçe Alı Aqış häm anıñ yärdämçeläre ölkän buyın tatar zıyalılarınnan, internetqa berençelärdän bulıp kergän keşelärneñ berse. Ul yäşlär belän aralaşunı, internett säxifä aşa alıp bara. Anıñ säxifä berniçä yıl elek açılğan ide. Ä 2004 yılda Ali Aqışnıñ internettağı säxifäse tağı da yañarıp, zamançaraqqa äylände. Anda Ali Aqış üze, anıñ äsärläre turında tulı mäğlümat tabıp bula. Säxifäneñ adresı www.aliakis.org

«Tatnet» närsä ul digändä, ber niçä tatar säxifäsen küz aldına kiterep bula. «Tatnet – kemnär ul?», digändä internetnı üsterü öçen tırışuçı keşelärne, internetta bilgele şäxeslärne iskä töşeräbez. «Tatnet yodızları» bäygesen oyıştırıp, ütkärüçe Aynur Sibğätullinnı, berençelärdän bulıp, tatarlar turında internet säxifä açıp cibärgän İrek Bikininnı iskä alıp bula. Bu könnärdä, internetta, millättäşebez İlfaq Ğilfanovnıñ iseme yañğıradı. Küp kompyuter belgeçläre, «Microsoft» şirkäte eşläp çığarğan Windows sistemasında xatalar ezläw belän mäşğül. Bu könnärdä «Ekonomist» jurnalı yaña ber xata tabıluı turında xäbär itte. Şuşı xatanı tözäter öçen, kompyuternı tikşerer öçen ber yaxşı kompyuter programması bar ikän. İDA Pro digän programmanı Rusiä belgeçe İlfaq Ğilfanov yazğan bulıp çıqtı. «Azatlıq» xäbärçese Räfis Cämdixan Tatarstannıñ Tübän Kama rayonnan çıqqan, xäzer Belgiädä yäşäwçe tatar yegete belän elemtägä kerep, ozın äñgämä ütkärde. Kompyuternı saqlaw programması turında İlfaq Ğilfanov, anı inde 15 yıllap äzerläp kilüen äytte. Anıñ programmasınıñ şulay populär bulıp kitüen ul üze dä kötmägän häm anı irekle qullanırğa täqdim itä. Kem ul, İlfaq Ğilfanov, yazmış cilläre anıñ niçek Belgiägä taşlağan, tatar awılında tuyıp üskän yeget niçek itep dönyada iñ köçle komputer belgeçläre däräcäsenä üsep citkän, bu xaqtağı maxsus tapşırunı yaqın arada «Azatlıq» radiosı dulqınnarında tıñlağız.

Bikä Timerova.

XS
SM
MD
LG