Düşämbe könne “Azatlıq” radiosınıñ Qazan bülegenä Tatarstannıñ Aznaqay rayonında yäşäwçe Äcwät Cihanşin şaltırattı. Ul “Azatlıq”ta yäkşämbe könne yañğırağan Rimzil Wälineñ ğadi tatar awılınıñ yäşäyeşe turındağı tapşıruına qarata üz fikerlären belderde. Alarnı bez sezgä xörmätle tıñlawçılar kiläse tapşırularıbıznıñ bersendä işettererbez. Ä bügenge “Xalıq awazı” säxifäse qısalarında Äcwät äfändeneñ ğomumän “Azatlıq” radiosınıñ eşçänlegenä qarata fikerlären citkeräbez.
“Azatlıq” radiosın 40 yılğa yaqın tıñlawçı, Äcwät abıy tumışı belän Aznaqay rayonınıñ Suqayış awılınnan. Bala –çaqtan uq tarix belän bik qızıqsınğan. Häm bügen dä ul tarixi kitaplarnı uqıp, alarnı cıyıp bara ikän. Buş waqıtlarında kino, videoğa töşerü belän mawığa ikän. Ä Äcwät abıynıñ yaratqan şöğelläreneñ berse, borınğı muzıka uyın qoralların yasaw häm alarda uynaw. Ä xäzer Äcwät Cihanşinnı üzen dä tıñlıyq.
“Azatlıq”radiosın min küptännän tıñlıym häm qızıqsınıp tıñlıym. Ul bik zur problemalarnı çişä. Xalqıbız öçen bik küp fayda kiterä. Yäştän birle min anı tıñlıym inde, elek qaça – qaça tıñlağan bulsam, xäzer inde ap - açıq işetelä. Sezneñ söyläwegezdä böten närsä döres. Sezgä barısı öçen bik zur räxmät. Min anıñ ber ğayiben dä tapmıym. Barı tik yışraq qına işetelsen ide. Şulay uq tarix, xalqıbıznıñ, millätebezneñ uzğanın añlatıp barsa bik äybät bulır ide. Ul bit bik tä qızıqlı, min inde şularnı işetsäm bezneñ xalıq töşep qalğannardan tügel dip ğorurlana başlıym”. Xörmätle “Azatlıq ”radiosı tıñlawçıları sez “Xalıq awazı” säxifäse qısalarında Aznaqay rayonında yäşäwçe Äcwät Cihanşin fikerläre belän tanıştığız. Ägär dä inde sezneñ dä äytäse fikerläregez, teläk – täqdimnäregez bulsa, bezgä xat yazu öçen adres - 420012, Qazan 12, abonent tartması 155. Aznaqayda yäşäwçe Äcwät Cihanşin, Baltaç rayonındağı Rifqat Zaripov häm başqa bik küp tıñlawçılarnıñ bezne iğtibar belän tınlawları “Azatlıq” eşen kamilläşterüdä zur yärdäm bulıp tora.
Gölnaz Şäyxetdin
