Törkiäneñ üzäk Sivas vilayätendä yaña qoş kizüe oçrağı xäbär itelde. Ägär dä raslansa, Törkiädä qoş kizüen yoqtıruçılar sanı 15kä citkän bula. Kimendä 2 keşe ülgän. Xäzerge waqıtta qoş kizüe belän xastaxanägä salınğan ber xatın-qız menä närsälär söyläp birde: "Tawıqlarım ülgäç min alarnı yalan qul çığarıp attım. Küp tä ütmi tamağım awırta başladı, tänem qaynarlandı, bik qatı başım awırta başladı, annarı inde xastaxanägä kildem." Qoş kizüe Törkiädä tarala bara, awıruçılar könyaqkönçığış, başqala Änkara tiräsendäge üzäk töbäklär häm tönyaqtağı Qara diñgez yaqlarında tabılğan. Räsmilär süzlärenä qarağanda, awırunı yoqtıruçılar barısı da tere qoş belän eşläwçelär, çirneñ keşedän keşegä küçüe älegä küzätelmi. Könyaq Qırımda da 3 qoşçılıq fermasında qoş kizüe tabılğan, anda keşelärgä yoğu oçraqları turında xäbär itelmi. Törkiädä kön sayın meñlägän qoş yuq itelä. Kürşe illär Törkiädän qoş ite alunı tuqtattı. Rusiä Törkiä belän çik buyların häm kürşe illärdän qaytuçılarnı kontrolgä aldı.
