Qorban bäyräme uñayınnan oyıştırılğan matbuğat oçraşuında bergäläp eşläwçe “Bolğar” milli xäyriä üzäge citäkçese häm “Bolğar sintez” сämgıyäte räise Färit Miftaxov belän “Äniem-Mama“ fondı vitse-prezidentı Xälim Ğäynullin qatnaştılar.
Berençe bulıp Xäyriä aksiäläreneñ möhimlege turında süz bardı. Tormış qatlawlanudanmı, ällä inde däwlätneñ genä yärdäme citmägänlektänme Xäyriä oyışmalarına, alarnıñ citäkçelärenä möräcäğät itüçelär artuı turında äytelde matbuğat oçraşuında.
Qartlar, balalar yortlarınnan tış, ayırım keşelär dä awır xäldän yärdäm sorap möräcäğät itä başlağan. Xätta ki balasına mäktäp forması alırğa aqçası bulmawçılar da kilä ikän Färit Miftaxovqa.
Soñğı yılda ul tormış tarafınnan räncetelgän invalidlar öçen dä küp izgelek qıla başlağan. Qazanda invalidlarnı ternäkländerü üzägendä prokat açıp cibärgän. Här invalid buşqa üzenä kiräk caylanmalardan qullana ala. Şulay uq ğailä qorıp cibärüçe invalidlarğa yärdäm itü öçen tuy külmäkläre prokatın açırğa isäp tota. 2004 yılda “Altın yöräkle keşe” bäygesendä Färit Miftaxov ciñüçe bulıp bilgelängän. Üzeneñ süzlärenä qarağanda, ul xäyriä eşenä küpme aqça totılğanın belmi. Menä bıyıl da älege bäygedä qabat qatnaşırğa dip dokumentlar sorıy başlağaç qına isäbenä çıqqannar. 1 million 300 meñ sum aqça totılğan.
Çit illärdä xäyriä oyışmaları salımnan azat itelä. Şul säbäpleder anda şäfqätlek eşe cäyelgän. Läkin Färit Miftaxov Tatarstanda älege ısul uñış kiteräçäk dip sanamıy. Respublika salım aqçasına yäşi, di ul.
Bıyıl ul Qazan şähäre Duması deputatı itep saylanğaç monı añlawın äytte. Xätta ki anıñ üzenä dä salım tülämäw caylıraq bulsa da. Ul citäklägän Bolğar sintez oyışması neft'' ximiäse, orgsintez ölkäsendä eşli.
Färit Miftaxov häm Xälim Ğäynullin başqa oyışma-şirqat''lär citäkçeläre dä Bolğar xäyriä üzäge eşennän ürnäk alıp - bergä tuplanıp eşläsen ide di. Bu xaqta Xälim Ğäynullin:
Respublikada 10лап fondlar bar, ämma alarnıñ 90 protsentı käğäzdä genä. 18 xatın-qız oyışması qarıy bezneñ fondqa. Bu bit yaxşı tormıştan tügel.
Färit Miftaxov kübräk milli häm dini ölkälärgä iğtibar itüen belderde matbuğat oçraşuında. Uzğan yıl ul “Altın Mönbär” Xalıqara möselman kinosı festivale iğänäçese bulğan ide. Bu könnärdä Qorban çaldırıp bik küp yätimnärgä tarata. 13 ğinwar könne ul Mäskäw rayonı yätimnär yortında da Qorban aşı uzdıraçaq.
Landış Xarrasova
