Başqortstanda bügen Rusiä matbuğatı köne kiñ bilgelänä. Şuşı bäyräm uñayınnan respublika prezidentı Mortaza Räximov qäläm ähellärenä, radio-televidenie häm näşriätlär xezmätkärlärenä Qotlaw belän möräcäğät itte. Älege täbrikläwendä Mortaza Räximov Başqortstan jurnalistları eşçänlegenä yuğarı bäyä birä. “Bügen respublika mäğlümat kiñlegendä 800 dän artıq basma – däwlät, vedomstvo, şäxsi gäzitlär häm jurnallar, telekompaniälär häm radiostansiälär eşläp kilä. Alarnıñ poligrafik bazası häm texnik cihazlandırılışı daimi kamilläşä”, - dip äytä prezident.
Jurnalistlarnı hönäri bäyrämnäre belän respublikanıñ matbuğat, näşriät häm poligrafiä eşläre buyınça idärä citäkçese Boris Melkoedov, Başqortstannıñ xärbi komissarı Timofey Azarov häm başqa yuğarı citäkçelär dä qotladı.
Bäyräm könne Boris Melkoedov häm respublikanıñ Jurnalistlar berlege citäkçeläre küp kenä gäzitlär häm jurnallarnıñ baş möxärrirlären, kürenekle jurnalistlarnı cıyıp, “tügäräk östäl” oçraşuın da oyıştırdı. Anda, älbättä, bäyräm kön bulğanğa, süz, nigezdä, Başqortstan matbuğatınıñ soñğı yıllardağı yuğarı qazanışları xaqında ğına bardı. Törle gäzitlär häm jurnallarnıñ tege yäki bu hönäri bäygelärdä ciñüläre isemläp ataldı. Bügenge “tügäräk östäl” söyläşüennän şul näticä çıqtı – Başqortstan matbuğatı qayber üzäk federal'' basmalar kebek sensatsiä artınnan qumıy, ä tormıştağı uñay yaqlarnı kürsätergä tırışa ikän.
Şul uq waqıtta bäysez mäğlümat çaraları wäkilläre häm respublikadağı törle partiälär äğzaları fikerençä, Başqortstan matbuğatı bügenge köndä süz irege bulmawdan integä. Respublikada irekle matbuğat basmaları yuq, ägär inde andıylar baş qalqıta başlıy ikän, alarnıñ awızın tiz genä tomalarğa aşığalar, - dip belderä demokratik köçlär wäkilläre. Yaña yıl aldınnan ğına Mäskäwdäge ber tikşerenü üzäge dä ildäge töbäklär matbuğatın öyränü näticälären iğlan itkän ide. Anda da Başqortstanda süz irege bulmawı törle faktlar belän raslanğan. Tikşerenü üzäge belgeçläre fikerençä, Başqortstanda räsmi xakimiätlär finanslağan gazeta-jurnallar bik qatı kontrol'' astında qala.
Matbuğat köne uñayınnan törle gäzitlärdä maxsus yazmalar bastırıldı. “Başqortstan” isemle başqort telendä çığuçı gäzitneñ comğa sanındağı “Närsä, başqort gäzite belän bäxilläşerbezme?”, dip isemlängän mäqälä diqqät''ne cälep itä. Anda Neftekama şähärendä tellär turındağı qanunnıñ ütäleşe tiräsendäge ığı-zığılar häm anda berniçä yıl başqort telendä çığıp kilgän “Neftekama yañalıqları” digän gäzitneñ yabılu ixtimallığı turında mäğlümatlar birelä. Şuşı mäqälädä “Azatlıq” radiosına da qayıp taşlana. “Azatlıq” radiosı Başqortstanda tatar rayonnarın başqortlaştıru xaqında laf ora” dip äytelä bu yazmada. Başqort telen ğämälgä quyunı tieşle däräcädä alıp barmağanğa kürä, eşlärennän quıluçılarnı da yaqlıy “Azatlıq” radiosı, dip belderä mäqälä avtorı. Neftekama şähärendä zur küpçelek xalıqnı tatarlar täşkil itä. Şuña kürä dä anda mäktäplärdä başqort telen kköçläp kertügä elektän ük qarşılıq bar ide. Xäzer anda qayber yuğarı citäkçelärne tellär turındağı qanunnı ütämäwdä ğäipläp, yäğni başqort telen kertüne aqrın alıp baruda ğäipläp eşlärennän çığaru, bu şähärdä şaqtıy kierenkelek tudırğanlığı küplärgä mäğlüm.
Başqortstan matbuğatınıñ bügengese xaqında bäxäslär tiz genä tınmas äle. Çönki respublika xakimiätläre üz qullarında bik küp mäğlümat çaraların tota häm alarda üz säyäsätlären çağıldıra. Ä bu inde gel genä süz irege mömkinlekläre belän turı kilep betä digän süz tügel.
