Düşämbe irtäsendä Qazanda temperatura minus 31 däräcädä ide. Urını – urını belän annan da salqınraq. Aldağı könnärdä salqın 40 gradusqa qädär artaçaq dilär.
Mäktäplärdä uqular tuqtatıldı, Qazan – Yuğarı Oslan, Qazan – Çıta kebek marşrutlarda avtobuslar qabınmaw säbäple, xäräkät tuqtaldı. Şähär transportınıñ yartısınıñ kübräge genä yulğa çığa aldı. Ğädättän tış xällär xezmäte, cılıtqıç cihazlar belän qullanğanda saq bulırğa yanğın çığarmasqa çaqıra. Seber yaqlarında -30, -40 gradus ğädäti bulıp sanalsa da, İdel – Ural yaqlarında hawanıñ dımlılığı başqaçaraq, şuña kürä salqın monda awırraq kiçerelä.
Salqın buluğa qaramastan, ictimaği – säyäsi tormış tuqtalmıy. Amur ölkäse gubernatorı Leonid Korotkov üzeneñ öç urınbasarı belän Qazanğa kilep, mondağı iqtisadi täcribäne öyrände.
Sişämbe kiçke säğät 11 dä Çallığa “Daqar 2006” avtomobil'llär yarışınnan, 7 tapqır şuşı bäygedä ciñüçe bulıp çıqqan Vladimir Çağin ekipajı häm öçençe urınnı alğan Firdäwes Kabirov ekipajı qaytıp töşäçäk. Kamaz maşinaları salqında ğına tügel, Afrika essesendä dä çıdamlı bulıp çıqtı.
Rimzil Wäli
