Utırışqa Bötentatar ictimaği üzäge, Milli Şura, “Mäğärif” assotsiatsiäse häm “Milli mäcles” oyışması wäkilläre kilgän ide. Alar borçılu belderep milli belem birügä qurqınıç yanıy dip sanıy. Çönki Tatar ictimaği üzägenä möräcäğät itüçelär artqan. Mäsälän Leninogorski mäğärif bülegendä milli eşlär öçen cawaplı xezmätkär qısqartılğan, Çistaynıñ ike awılında tatar mäktäbe yabılğan. Ämma bu küreneşlär artqannan-arta ğına bara dip sanıy tatar cämäğätçelege. Elek ministrlıyklarda, rayon mäğärif büleklärendä milli mäktäplär belän eşläw, milli mäs'älälär buyınça urınbasar wazifaları bar ide. Xäzer alar qısqartıla bara. Bu xaqta Bötentatar ictimaği üzäge räise Tälğat Barıyev
Bu Rusiädän kilgän säyäsät. Milli mäğärifne qısu bara. Tömändä dä tatar telen atnasına ber tapqır ğına uqıtuğa qaldırğannar. Bez borçılu belderäbez.
Utırışqa Respublikanıñ Mäğärif häm fän ministrlıygınnan da wäkillär çaqırılğan bulğan. Läkin alar qatnaşmağannar.
“Azatlıq” radiosı comğa könne bu mäs'älä buyınça şulay uq berniçä tapqır TR Mäğärif häm fän ministrlığına şaltırattı. Ministrlıqnıñ matbuğat särqatibe Liliä Nuretdinova ministrnıñ berençe urınbasarı Danil Mostafinnıñ Ministrlar Kabinetında cıyılışta buluın häm sorawğa cawap birmä almawın belderde. Şulay uq milli mäğärifne üsterü bülege başlığı, Radik Zaripovqa şaltıratqaç anıñ da cıyılışta buluın assızıqladılar. Tapşıru efirğa äzerlänü däwerendä ministrlıq wäkilläre belän elemtägä kerep bulmadı.
Tatar milli cämäğätçelege utırışta Tatarstan prezidentına möräcäğät qabul itte. Anda tatar telen däwlät tele bularaq üsterü, tatar telendä belem birü sistemasın saqlap qalu çaraların kürü sorala.
Tatar cämäğätçelege ägär milli belem birü sistemasına basım yasalu däwam itsä, bu mäs'älä buyınça kiñräk cıyılışlar uzdırırğa häm xalıqnı cälep itärgä cıyına. Çönki utırışta qatnaşqan Tatar däwlät gumanitar-pedagogiä universitetı uqıtuçısı Ğamircan Däwlätşin yaña barlıqqa kilgän universitet ta milli yözen yuğalta baruın belderde.
Landış Xarrasova.
