Accessibility links

Кайнар хәбәр

Udmurtiädä berençe milli köräş turnirı uzdı


Udmurtiädä milli köräş federatsiäse oyışuı turında sez xäbärdar, xörmätle tıñlawçılar. Köräşçelär küptän tügel genä berläşüenä qaramastan, Çallıda bulıp uzğan Rossiä qälämendäge bäygedä qatnaşıp, öçençe urınnı ayulap qayttı. Federatsiäneñ çirattağı çarası respublika küläm milli köräş bäygese buldı. Ul 4 fevral''dä İjawda uzdı, hem tatar xalqınıñ batır ulı Geroy şağir Musa Cälilneñ 100 yıllığına bağışlandı.

Yarışlarğa respublikanıñ tatarlar tuplanıp yäşägän Sarapul, Mojga şähärlärennän, Keçe Purğa rayonınnan, şulay uq kürşe Tatarstannıñ Ägerce rayonı häm Çallı şähärlärennän dä 50 yaqın köräşçe kilgän ide. Bäyge tuğız ülçäü kategoriäsendä uzdı. Respublikada tatarça köräş federatsiäsen xuplap qarşı alsalar da, äle yärdäm itärgä aşığuçı yuq, älege turnirnı da milli-mädäni möxtäriät belän federatsiä eşquar millättäşlärebez yärdämendä oyıştırdı, dip assızıqladı federatsiä räise Fändus Xujin.

Udmurtiä tatarları başlanğıçın xuplap, Qazannan da däräcäle qunaqlar kilgän ide. BTK başqarma komitetı räise Rinat Zakirov häm Tatarstanınıñ köräş federatsiäse räise urınbasarı Nail Xämidullin kongressnıñ täqdimen Udmurtiä milli-mädäni möxtäriäte tiz arada tormışqa aşıruın, häm berençe turnirğa köräşçelärne küpläp cıya alularına yuğarı bäye birdelär.

Yarışnı yäş malaylar başladı. Alar Ägerce rayonı Keçek awılınnan maxsus kilgän. Alda äytelgänçä, bäygedä yegetlär sigez ülçäw buyınça köç sınaştı.

Yarışlar altı säğätkä suzıluına qaramastan, zal tamaşaçı belän tulı buldı. Respublikada elek tatarça köräşne sabantuylarında ğına küzätep bula ide, şuña da aña sportnıñ ber töre bularaq iğtibar birelmäde. Yegetlärneñ tatarça köräş belän şäkellänergä teläkläre bar. Sarapulda älegä köräş seksiäse yuq, üzebez tırışabız, dip urtaqlaştı İldar Gil''fanov, ul turnirnıñ in köçle köräşçeläre arasında ikençe urınnı ayuladı.

Bu xaqta Mojgadan Şamil Ramazanovta şundıy uq fikerlären citkerde.

Tağın şunı da bilgeläp ütärgä kiräk, elek sabantuylarda yegetlär bil alışıp, köç sınaşsa, bügen köräşçelär öçen şuşındıy turnirlar aqça eşläw çığanağı da bulıp qala, dip bilgeläde Şamil Ramazanov.

Şamil'' Ramaznov 90 kilogrammnan yuğarı bulğan köräşçelär arasında ikençe urınğa layıq buldı.

Bäygene qararğa törle yäştäge tamaşaçı kilgän. Alar bäygedän qänäğät.

Dörestän dä köräş – elek elektän tatar xalqınıñ fizik kul''turasınıñ yözek qaşı bulğan. Tatarça köräşne üsterüne küzallap tatarça köräş federatsiäse inde Rossiä külämendä terkälgän. Bu xaqta BTK başqarma komitetı räise Rinat Zinnurov citkerde.

Udmurtiädä balalarğa köräş belän şöğellänü öçen çaralar kürelä başlandı. İjawda 10 mäktäptä tatarça köräş seksiäse inde eşli başlayaçaq. Tatarstanlılar maxsus keläm büläk ittelär.

Udmurtiädä berençe tatarça köräş bäygeseneñ töp batırı bulıp İjawdan Tahir Xucagaliev qaldı. Qazannan Nail Xämidullin belderüençä, Udmurtiä köräşçeläre Qazanda 16 fevral''dä Musa Cälilgä bağışlanğan bäygedä Tatarstan häm başqa regionnardan kilgän köräşçelärgä köçle köndäşlär bulaçaq.

Xämidä Ğayfullina, İjaw

XS
SM
MD
LG