Accessibility links

Кайнар хәбәр

Amerikanıñ Rusiädäge ilçese William Burns: "Soñğı un yılda Qazan häryaqtan üseş alğan"


Amerikanıñ Rusiädäge ilçese Uil'yam Berns Qazanda soñğı tapqır monnan un yıl elek bulğan. Şul däwer öçendä ul Tatarstan başqalasınıñ şaqtıy üzgärgänen äytte matbuğat oçraşuında. Qazannıñ maturayuına basım yasadı häm iqtisadi yaqtan üseş alğanın bilgeläde. Uil'yam Berns un yıl elek Qazanğa kilgändä - Sovetlar Soyuzı tarqalğannan soñ tormışnıñ awır buluın häm monıñ qartlar tormışında ayıruça çağıluın assızıqladı.

Ul Qazandağı dinara mönäsäbätlärneñ böten dönyağa ürnäk bulırlığın äytte

Min Tatarstanda dini wäkillär belän oçraştım. Älege şähär İslam tarixında zur rol' uynıy. Miña qalsa böten illär dini tatulıq mäğnäsendä sezdän ürnäk alırğa tieş..

Matbuğat oçraşuında İran belän bulğan mönäsäbätlärgä qağılışlı sorawlar buldı. Uil'yam Berns diplomat bularaq Yaqın Könçığışta eşlägän. Bu xaqta Uil'yam Berns

Ameriqa häm Rusiä belän bergä İran mäs’äläsendä tığız eşlädek. Amerika da, Rusiädä dä, İrannıñ atom qoralın buldıruı dönyağa qurqınıç tudıra digän fikerdä tora. Häm monı xalıqara jämägat'çelekkä citkerergä kiräk.

Uil'yam Berns Amerika häm Tatarstan studentları arasındağı almaşu programmalarına, yäğni Tatarstan studentlarınıñ Amerikada barıp, ä Amerikalılarnıñ Tatarstanğa kilep belem alularına tuqtaldı. Bügenge köndä bezneñ respublikadan 600 student Amerikada uqıp qaytqan.

Uil'yam Berns kiläçäktä yäş eşmäkärlär arasında da üzara almaşu oyıştırırğa kiräklegen äytte.

Studentlardan tış Amerika ilçese urta mäktäplärdäge matematika häm tögäl fännär uqıtuçıları arasında almaşu programmaları buldırırğa kiräklegen assızıqladı. Uil'yam Berns Rusiä tögäl fännär buyınça belgeçlär äzerläwdä şaqtıy alğa kitüen, ä Amerikanıñ awırlıq kiçerep kilüen bilgeläp uzdı.

Şulay uq xoquq yaqlaw oyışmaları häm viza säyäsäte turında da sorawlar birelde. Bilgele bulğança Amerika Rusiädäge däwlätneke bulmağan xoquq yaqlaw oyışmalarına grantlar, yäğni aqçalar birep tora. Bu bilgele Rusiä citäkçelegenä oşap betmi häm xäzer Däwlät dumasında monı çikläw turında qanun qarala. Uil'yam Berns demokratiäne tağın da üsterü öçen grantlar birü kiläçäktä dä däwam itäçägen äytte.

Amerikağa kerü öçen viza yasaw mäs’äläsendä kilgändä Uil'yam Berns anıñ uzğan yıl belän çağıştırğanda 50 protsentqa artqanın bilgeläp uzdı.

Ul viza eşlänep birelü waqıtınıñ kimetelüen äytte.

Monnan tış matbuğat oçraşuında Rusiäneñ Berdäm säwdä oyışmasına kerü mäs’äläsenä tuqtaldılar. Amerikanıñ Rusiädäge ilçese Uil'm Berns älege oyışmağa kergäç Rusiäneñ üz tovarların böten dönyağa tanıtu öçen mömkinlege artaçağın, şul uq waqıtta zur köndäşlekkä äzer bulırğa kiräklegen äytte.

Landış Xarrasova

XS
SM
MD
LG