Accessibility links

Sverdlovski ölkäse balaları Qazanda “Dulqınnar” digän şiğer bäyrämendä qatnaşaçaq


Sverdlovski ölkäsendä patriot-şağir Musa Cälil şiğerlären uqu buyınça balalar arasında konkurs-bäyge bulıp uzdı. Bu bäygene Tatarstannıñ Uraldağı daimi wäkillege Sverdlovski ölkäseneñ yäşlär belän eşläw departamentı häm ölkäneñ tatarlar tuplanıp yäşi torğan Könbatış idärä okrugı citäkçelege belän berlektä oyıştırğan ide.

Tatar awılları mäktäplärendä häm yäkşämbe mäktäplärendä uzdırılğan bäygelärdä ciñüçelär bu könnärdä Yekaterinburg şähärendä ölkä konkursında köç sınaştılar. Bilgele inde, tatar awılında yäşäp, söyläm telen yaxşı belgän balalar belän şähär cirendä üsep, tuğan telne başlıça yäkşämbe mäktäbe däräcäsendä genä öyränüçe balalarnı üzara çağıştıru qıyın. Şuña qaramastan, Yekaterinburg qızı Nazlığöl İjguzina, söyläw ostalığı yağınnan barısınnan da uzdırıp, berençe urınnı alırğa ireşte

İkençe häm öçençe urınnarnı Tübän Sırğa rayonı Şäkür awılınnan Denis Bädretdinov häm Ärtä rayonı Äceğol awılınnan İnzilä Däwlätşina büleştelär. Balalarnıñ äzerlek däräcäse turındağı sorawğa jyuri äğzası, Tatarstannıñ Uraldağı daimi wäkile urınbasarı Xäydär Gıyl''fanov tatar awılları mäktäplärendä Cälil icatına tieşleñçä iğtibar birelmägänlege kürenep toruın, şiğerlärne klasstan tış uqu däräcäsendä genä öyränelüen äytep ütte häm tatar uqıtuçıları tatar xalqı ğorurlanırlıq şäxeslärne öyränügä kübräk waqıt birsennär ide digän teläk belderde. İkençe jyuri äğzası, “Saf çişmä” gazetası möxärrire Minsılu İjguzina uquçılarğa şiğerlärne kübräk uqırğa, basımğa, tempqa, intonatsiägä iğtibar birergä täqdim itte. Miñsılu xanım fikerençä, rus arasında yäşäp, tatar şiğerlären öyränüçe balalarıbız buluı bik quandıra, millätebez sänğäteneñ kiläçäge buluğa ömet tudıra.

Bäygedä ciñep çığuçı balalarğa Yekaterinburg şähärendä eşläp kilüçe Milli media-xolding tarafınnan tatar kitapları büläk itelde. Şulay uq ciñüçelärneñ Qazanda uzdırılaçaq “Dulqınnar” isemle respublika konkursında qatnaşu xoquqına iä buluları balalar öçen bik quanıçlı xäbär buldı. Bu könnärdä Sverdlovski ölkäse balaları Qazan qalasına yul tottı.

Fäwiä Safiullina,Yekaterinburg.

XS
SM
MD
LG