Accessibility links

Кайнар хәбәр

Semberdän qaçqan xärbilärne nindi cäza kötä?


Qaçqınnarı belän dan yaulağan 31-hawa-desant brigadası qorbannarı turında “Azatlıq” radiosı aşa xäbärlär bulğaladı inde. Menä tağın. Bu yulı Ufadan da xäbärlär işetelde. Qaçqınnar törle bula: Tatarstan cirendä ĞAİ xezmätkärlären üterep, 24 balanı yätim qaldırğan çın bandit qaçqınnardan ayırmalı bularaq, Ufağa yul alğan 4 soldat yawızlıq qılmağannar – yawızlıqtan qotılu çaraları ğına ezlägännär.

“Kire Sembergä qaytqaç, niçek qarşılağannar soñ alarnı?” – digän soraw Xärbi komendaturağa kiterde. Yazu-sızular bülmäse xucabikäse Tat'yana Anatol'yeva xärbi komendant Naugol'nov isemenä cibärelgän ğariza belän tanıştırdı: “Ryadovoy Bogomyagkov, Safin, Venediktov, Belyakovlarnıñ 85955-yençe çast'ne röxsätsez taşlap kitü faktın tikşerü öçen, alarnı 44503-nçe xärbi çast'kä küçerüegezne sorıym. Tikşerü näticäläre belän Sezne tanıştırırbız”

Prokuratura tikşerüçese yustitsiä leytenantı V. İ. Petrov”

Qaçqınnarğa närsä yanıy soñ?

Bu sorawğa Xärbi prokuraturada cawap alıp bulmadı. Leytenant Petrov, prokuratura röxsätennän başqa, bu turıda berkem belän dä söyläşä almıy ikän. Ä prokuror 15 säğättän soñ ğına kiläçäk, didelär.

Qaçqınnar bişäw bulğan ikän. Bişençese, Artem İvanov, 2 säğätlek yul yıraqlığında ğına yäşäwçe äti-änilärenä kitkän bulğan. Anı totıp alıp qaytarğannar. Ufadan qaytqan 4 soldatnı qabul itkän çast'neñ KPPsında 2 äni keşe ulları belän oçraşu kötep toralar ide. Ufa yegete Aleksey Venediktovnıñ änise Marina Balyasnikova ulınıñ qaçıp kitüen yalğış adım, dip bäyäläde. Monda uq prokuraturağa möräcäğät itärgä bulğan, dide ul. “Ä nigä näq Sezneñ fatirnı saylağannar?” – digän sorawğa “Başqa mömkinlekläre bulmağandır”, - dip cawap birde. Smolenski da, Perm dä yırağraq, taksi alğannar da iñ yaqın yul saylağannar. Ä taksi öçen ata-analar kümäkläp tülägännär.

4 äni keşene dä Sembergä kiterep, prokuraturağa bergäläp möräcäğät itü dä anıñ başlanğıçı belän oyıştırılğan: telefon aşa barısın da Sembergä çaqırğan. Marina xanım äytüençä, prokuratura alarnı bik cılı qabul itkän.

Qaçqınnar arasındağı berdän-ber başqort yegete Ruslan Safin äytüençä, bu qaçunıñ oyıştıruçısı bulmağan, barlıq tuqmaluçılarnıñ başına qaçu niäte beryulı kilgän. Bu yeget Omskida berençel belem alğan, Semberdä urnaşqan xärbi çast'kä noyäber 16 da ğına kilep urnaşqan. Häm cäberläwlärgä duçar bulıp yäşägän. Ruslan älege tikşerüneñ üzläre faydasına tämamlanuına ışana. Dimäk xaqlı sanıy. Mondıy ömetkä nigez dä bar kebek: bu çast'tä alar başqa soldatlar belän ber ük wazifa başqaralar.

Çast' komandirı polkovnik Samarin isä prokuraturanıñ nindi qarar çığaruı turında söyläşüdän baş tarttı. Nigezlämäse dä ışanırlıq kebek. Tikşerü betkänçe, räsmi fiker yañğırarğa tieş tügel. Ä min, yurist bulmasam da, räsmi keşe – ofitser, dide ul.

Ayrat İbrahim, Sember.

XS
SM
MD
LG