Tömän ölkäseneñ könyağında tatar mädäniäte könnäre uzaçağı turında radio tıñlawçılarıbızğa äytkän idek. Bu könnär 13 nän 19 nçı fevral'gä qädär uzarğa tieş ide. Milli mädäniätlär yortında tatar bülegeneñ başlığı Cämilä Räximova äytüençä, milli eşlär komitetınnan aqça waqıtında kilep citmägängä bu könnärne 22 sennän 28 nä qädär küçerdelär.
Mäğlümat çığanaqları xäbär itüençä, mädäniät könnären açu tantanalı räweştä kürgäzmälär oyıştırılıp, milli mädäniätlär yortı qarşında eşläwçe sänğät törkemnäreneñ çığışları belän başlanırğa tieş ide.
Bu çaranı yazabız, töşeräbez dip kilgän jurnalistlar, barlığı 8 çığanaq wäkilläre bar ide, Milli mädäniätlär yortınıñ işege östenä elengän iğlan tasmasındağı yazuğa aptırağanlıqları turında gäp quyırttılar. Anda urısça “Otkrıytie 22 fevralya TATARSQOY KUL'TURI zakrıtie 28 fevralya” dip yazılğan ide. Dni süzeneñ töşep qaluın xätta milli mädäniätlär yortı başlığınıñ urınbasarı Sergey Fil' da kürmägän ikän.
jurnalistlardan, sänğät törkemnäre cırçıları, biyuçelärennän qala çarağa türälär dä, tamaşaçılar da kilmäde. Şulay da açmıyça buldıra almadılar. Cämilä Räximova: “Min mädäniätlär komitetına da, milli eşlär komitetına da, milli avtonomiä türälärenä dä çaqıru käğäzläre ilttem bit”,- dip aptırap yörgännän soñ säxnägä kütärelergä mäcbür buldı.
Milli mädäniätlär yortı mödireneñ milli eşlär buyınça urınbasarı Sergey Fil' üzeneñ çığışında bu çarada kürenmägännärenä milli eşlär komitetı, mädäniät komitetı häm milli avtonomiä türäläreneñ başlarınnan sıypamadı. “Tömän ölkäsendä yäşi torğan barlıq etnoslarnıñ yıl da uza torğan mädäni könnären açu başında, berençe bulıp tatar mädäniäte könnäre tora, dip äytte. İnde işek östenä elengän yazuğa kilgändä, kiç belän “Dni” digän süzne östägännär ide. Ämma “dni” süze “tatarskoy” süzeneñ östenä çäpälgängä uzıp baruçılar anı “Otkrıytie Dni tarskoy kul'turı” dip uqıdı. Şulay itep tatar mädäniäte tara mädäniätenä äylänep qaldı.
Nail Alan, Tömän.
