Accessibility links

Кайнар хәбәр

İñ tübän xezmät xaqı – büdjet ölkäsendä


Respublikanıñ Xezmät häm mäşgul'lek ministrlığı belän Sotsial' yaqlaw ministrlığınıñ utırışları yäkşämbe könne uzdı, häm 3şär säğät däwam itte. Anda Tatarstan Premyer-ministrı Röstäm Miñnexanov ta qatnaştı. Şul forsattan faydalanıp yomışları bulğannar anı şuşı yıllıq utırışlarda äytep qalırğa tırıştılar.

Qayber sotsial' üzäk citäkçeläre arenda bäyäseneñ yuğarı buluınnan zarlandı. Bolay da tormış tarafınnan cäberlängännär öçen buldırılğan üzäklärdän zur summalar taläp itelüe mäğnäsezlegek dip äytelde.

İkençeläre, sotsial' uçrejdenielärdä xezmät xaqınıñ tübän buluınnan zarlandılar. Şunıñ näticäsendä bu ölkädä xezmätkärlär ozaq totqarlanmıy dielde.

Xezmät häm mäşgul'lek ministrı Boris Zaxarov xalıqnı eş belän tä'min itü, xezmät xaqı mäs’äläsenä tuqtaldı. Uzğan yıl xezmät xaqı urtaça 7055 sum bulğan dielde utırışta. Bıyıl anı 8170 sumğa citkerü küzdä totıla ikän. Ämma awıl xucalığında häm byudjet ölkäsendä xezmät xaqı şaqtıy tübän bulıp qala - 3-4 meñ sum tiräse. Bu xaqta Tatarstan Premyer-ministrı Röstäm Miñnexanov: “Byudjet ölkäsen tulısı belän üzgärtergä kiräk”, - dide.

Yuğarı uqu yortların betergän yäşlärneñ dä kübese bügen eşsez utıra dielde kollegiädä. Qısqartular säbäple, könnän-kön kübäygän eşsezlär räten bügen yäşlär arttıra. Şul uq waqıtta respublikada ğadi eşçelär - timerçelär, elektriklar citmi.

Citeşterüdä ülü, törle cäräxätlär alu turında da söylände utırışta. Tatarstan däwlät xezmät inspeksiäse xäbärlärenä qarağanda, 2005 yıl buyınça respublikanıñ citeşterü ölkäsendä 129 keşe ülgän, ä 360 keşe awır cäräxätlär alğan. İminlek mäs’äläse berençe urında bulırğa tieş dip kisätte Röstäm Miñnexanov. Uñay misal itep çit illär kiterelde.

Sotsial' yaqlaw ministrı Klavdiä Novikova yıl däwamında xalıqqa kürsätelgän yärdäm turında söyläde. Taşlamalarnı aqçağa almaştıru qanunı qabul itelgäç, xalıqqa subsidiälär bilgeläw, añlatu eşläre alıp baru yöklände bu ministrlıqqa. Klavdiya Novikova bu mäs'älä buyınça, ayıruça awıllarda bügen dä möräcäğät itüçelärneñ şaqtıy buluın äytte.

Aprel' ayınnan subsidiä alu öçen yañaça isäp-xisap başlanaçaq -- Rusiäneñ yaña qararı buyınça. Klavdiya Novikova berniçä aydan tağın da zurraq eşlär başlanuın belderde. Şul uq waqıtta xalıqnı sotsial' yaqlaw ölkäsendä eşläwçelär üzläre dä bügenge köndä şaqtıy tübän xezmät xaqı aluın borçılıp söyläde. Häm üzlärenä yaqlaw kiräklegen äytte.

Respublikada sotsial' yaqlaw üzäkläreneñ kübäyuenä qaramastan, anda möräcäğät itüçelär dä arta dielde. Röstäm Miñnexanov sotsial' üzäklärneñ sanın arttıru belän artıq mawıqmasqa kiñäş itte, bulğannarınıñ sıyfatın yaxşırtırğa kiräk dide.

Landış Xarrasova

XS
SM
MD
LG