Accessibility links

Кайнар хәбәр

Slobodan Miloşeviçneñ ülem säbäplären tikşerü bara, anıñ tarafdarları Xalıqara mäxkämäne ğäyepli


Haagtağı Xalıqara mäxkämä şimbä kön zindadnında üle kileş tabılğan Slobodan Miloşeviç mäyeten yarıp tikşerü qararın birde, bu eş Serbiädän kilgän meditsina belgeçläre qatnaşında uza.

Şuşı tikşerü elekke yugoslav prezidentınıñ ni säbäple ülüen açıqlarğa tieş. 64 yäşen tutırğan Miloşeviç soñğı aralarda yuğarı qan basımı häm yöräk problemalarınnan intekkän ide. Şimbä irtän anıñ mäyete Berläşkän Millätlärneñ Scheveningen törmäsennän Haagtağı mäxkämä meditsinası institutına kiterelde. Yaru holland tabibları tarafınnan alıp barıla, ämma bu eş Belgradtan çaqırtılğan ölkän patalogoanatom qatnaşında uzaçaq, dip belderde mäxkämä wäkile. Elegräk, Miloşeviç ğailäse mäyetne Mäskäwdä tikşerü taläbe belän çıqqan ide digän xäbärlär buldı, läkin mäxkämä monı kire qaqtı. İnde şimbä könne ük, Miloşeviçneñ üleme tabiği säbäplärdän bulğanğa oşap tora dip xäbär itelgän ide. Ämma märxüm ğailäse häm anıñ yaqın tirälege, elekke yugoslav prezidentınıñ üleme öçen Xalıqara mäxkämä cawaplı digän qaraşta qala birä. Anıñ xoquq kiñäşçelärennän berse Zdenko Tomanoviç, törmädä çaqta Miloşeviçne ağulaw tırışlıqları bulğan, dip belderde:

"Miloşeviç ğailäse belän kiñäşkännän soñ, min räsmi töstä mäyetne tikşerüneñ Haagta tügel, ä Mäskäwdä ütkärelüen taläp ittem. Min bu taläptän waz kiçmim, çönki elek Miloşeviç üze, anı törmädä ağularğa tırışu oçraqları turında beldergän ide", di Zdenko Tomanoviç, Slobodan Miloşeviçneñ xoquq kiñäşçese.

Ğinwar ayında Miloşeviş sälämätlegeneñ naçarayuna zarlanıp, däwalanu öçen üzen Mäskäwgä cibärüne sorağan ide, tik Mäxkämä monı kire qaqtı, ul Haagtağı doktorlar tarafınnan da däwalana ala, dip belderde. Miloşeviçneñ Mäskäwdä yäşägän enese Borislav xäzer, anıñ üleme öçen Xalıqara mäxkämä cawaplı dip isäpli:

"Min üz xisläremne belderep beterä almıym. Slobodannı min bik yarattım. Anıñ üleme öçen bar cawaplılıq tribunalda häm Belgradta anı 5 yıl elek Haagqa birgän qüwät köçläre östendä. Ul ciñelmägän kileş ülde, bezneñ xalıq öçen bu bik möhim", di Slobodan Miloşeviçneñ Mäskäwdä yäşäwçe qärdäşe Borislav.

Ämma, elekke yugoslav cirlärendäge suğış cinayätlären tikşerüçe mäxkämä bu ğäyepläwlärne kire qağa, eşe qaralğan här totqın tieşle däräcädä qayğırtıla, dip belderä.

Miloşeviç ülemeneñ säbäplären açıqlawğa qarağanda, berençe planğa xäzer anı qayda häm qayçan kümü mäs''äläse çığa. Bu älegä haman da bilgele tügel. Miloşeviçneñ enese Borislav, ul Belgradta cirlänergä tieş, dip belderä, ä qızı Marja isä ätisen anıñ tuğan yağında, Çernogoriädäge ber keçkenä şähärçektä kümüne yaqlıy. Miloşeviçneñ tarafdarları anıñ wafatın "zur yuğaltu" dip bäyäläsä, Bosniä, Xorvatiä, Kosovoda yäşäwçelär, anıñ üleme, ul qılğan cinayätlärneñ qorbannarına qarata küpmeder däräcädä ğädellekne torğıza dip isäpli.

Kärim Kamal
XS
SM
MD
LG