Şuşı könnärdä, mäğärif ölkäsendä zamança texnologiälärneñ qullanuı digän kiñäşmä ütte. Anda mäktäplärdäge cihazlarğa qağılışlı qayber sannar yañğıradı. Mäsälän, ministr Räis Şäyxelislamov şundıy mäğlümatlar belän tanıştırdı. Tatarstanda, urtaça sanağanda, ber kompyuter sıynıfına 10 sanaq bar. Barlıq uquçılar sanına quşıp sanağanda, ber kompyuterğa 23 uquçı turı kilä. Bu urtaça sanağanda kilep çıqqan sannar. Leninogorskiy, Tubän Kama, Çallıda urtaça 30 balağa - ber kompyuter. Sanaqlarnıñ 40% - iskergän, barlıq kompyuterlarnıñ 80% - tuzğan ikän. Yaña kompyuterlar alınğan bulğan, alar häm web-kamera, sanlı foto-apparat, awıru balalar tärbiälänüçe 11 internatqa birelgän. Şulay uq, mäğärif ministrı, mäktäplärne internetqa totaştıru proyektı tämamlanuı turında xäbär itte. Qazannan yıraq torğan uqıtuçılar, dönya kompyuter çeltärenä genä tügel, respublika mäktäpläre genä kergän keçeräk çeltärgä, İntranetka dä totaşa ala. Läkin, ministr, çeltärneñ mäğlümatlarnı tapiru küläme bik az, eşläw tizlege bik äkren buluın tanıy. Barlıq awıl mäktäpläre internetqa Dial-Up texnologiäse belän totaştırılğan. Xakimiätlär, barlıq mäktäplär dönya kompyuter çeltärenä totaştırılğan, dip äytep kilsä dä, mäğärif ministrnıñmı çığışında äle totaşıp betmägän 148 mäktäp barlığı äytelä häm tağın 6 uçulişe dä çiratta tora ikän. Häm sistemalar tizräk eşli torğan, kübräk mäğlümatnı yıraq arağa tapşıra ala torğan itep qorırğa, digän teläk belderä mäğärif ministrı. Ministrnıñ çığışında şulay uq, mäğlümati- belem birü sisteması tözelüe turında äytelä. Şuşı proyektnıñ maqsatı, tatar resurslarnı eşläw, tatar telen tanıy torğan programmalar äzerläw, axırdan yıraqtan torıp belgeçlär äzerläw, çittäge tatarlarğa mäğlümat, belem birü, mädäni yaqtan yärdäm kürsätep torunı küz aldında tota. Läkin bu äle tormışqa aşırıla ğına başlağan proyekt, anı tämamlaw küpmegä suzılaçaq, bilgele tügel. Älegä, mäğärif ministrlığı, çittäge tatarlarğa, belem birü portalın uqıp torırğa täqdim itä - edu.kzn.ru . Mäğärif ministrınıñ internet säxifäse - www.tatedu.ru, Kazan belem birü çeltäre - www.kros.ru. Anda «tatar virtual gimnaziäse» digän bülek bar.
Bikä Timerova.
