Accessibility links

Кайнар хәбәр

Rice belän Straw kötelmägändä Bağdadqa kilde


AQŞ däwlät sekretare Condoleezza Rice belän Britan tışqı eşlär ministrı Jack Straw bügen kötelmägändä Britaniädän Bağdadqa kilde. Bu säfär bik köçle iminlek şartlarında yäşeren räweştä oyıştırılğan ide.

Rice Straw belän bergäläp Ğiraqtağı säyäsi citäkçelärneñ tizräk yaña xökümät oyıştırırğa çaqıruları turında belderde. Ğiraqta alar prezident Cäläl Talabani, premyer ministr İbrahim äl-Cäğfäri häm başqa yuğarı räsmilär belän oçraşa.

Kiçä Cäğfärine xakimiättän kitärgä çaqıruçılarğa Cäğfärineñ Şığıylar İttifağı da quşıldı. Kördlär häm Sönnilär Cäğfärineñ tağın ber möddätkä premyer ministr bulıp qaluına qarşı çığa. Bu yaña xökümät tözü söyläşülären dä totqarlıy. Şimbä könne

Rice Britaniä televideniesenä Ğiraqta watanşalar suğışı qurqınıçı arttı dip belderde. "Terroçı Zärqäwi kebeklär watandaşlar suğışı çığarırğa mataşqanda älbättä mondıy mömkinlek bar. Mäzhäb ayırmalıqlarına bäyle kierenkelek yıllar buyı köç belän repressiälär belän barğan häm xäzer monı säyäsät, kompromis aşa çişärgä tırışqan ildä älbättä mondıy qurqınıç bar" dide Rice.

Rice xäbärçelärgä bu säfär Ğiraqta yaña berdäm xökümär zaruriätenä ni qädär zur ähämiät birüebezne kürsätä dide.

AQŞ häm Ğiraq räsmiläre dikäberdä ütkän saylawlardan soñ inde 3 ay ütte häm ildä ğömüm suğış çıqmasın öçen berdämlek xökümäte tözü bik zarur di. Ğiraqta däwamlı mäzhäbara bäreleşlär başlanğanğa inde 5 atna tuldı. Könbatış diplomatları säyäsi şawqım köç qullanunı tağın da arttırır dip borçılu belderä.

Şimbä könne Rice AQŞ Ğiraqtnıñ demokratiägä taba xäräkätenä optimizm belän qarıy dide.

"Bez başqa yulğa küz salırğa tieş. Ä başqa yul şundıy. Bu keşelär zolım qaramağında yäşiäçäk, Säddam Xösäin kürşe illärgä häm üz xalqına yanawın däwam itäçäk. Ul çor inde bette. Ğiraqlılar demokratigraq kiläçäkkä taba bik qıyın yuldan atlıy. Bez moña şatlanırğa tieş. Qıyın ämma başqa yuldan yaxşıraq yul bu" dide Rice.

Straw tağın ber märtäbä Britaniäneñ Ğiraq mäs''äläsendä tuğrılıqlı buluın belderde, şul uq waqıtta zurraq täräqiät buluı zarur dide.

Şimbä könne Şığıy firqälär Kördlär häm Sönnilär belän zur koalitsiä turında yaña söyläşülär ütkärde. Körlär belän Sönnilär fevral'' ayında Şığıy İttifağı tarafınnan tağın ber möddätkä premyer wazıyfasına täqdim itelgän Cäğfärineñ xakimiättä qaluına kisken qaşrı çığa.

Naif Aqmal, Praga.
XS
SM
MD
LG