7-8 nçe aprel' könnärendä Tömän ölkäseneñ milli mäğärifne üsterü institutında här äytelgän süz Gabdulla Tuqay iseme belän bäylängän ide. Monda şağirneñ tuuına 120 yıl tulu uñayınnan “İ tuğan tel, i matur tel” digän festival' ütte. Oyıştıruçılar: ölkäneñ fän häm mäğärif departamentı, milli eşlär komitetı, mäğärifne üsterü institutı häm milli avtonomiä teläge belän bu çarağa Tuqayğa bağışlanğan däres birüçe häm klasstan tış çara ütkärüçe uqıtuçılar, şağirneñ şiğerlären häm cırların osta başqaruçı uquçılar, icatın räsem sänğäte aşa surätlängän keçkenä rässamnar cıyıldı. 18 uqıtuçı ber-ber artlı däres birep häm klasstan tış çara ütkärgän waqıtta uquçılar üzläreneñ ostalıqların kürsättelär. Här çığışnı da belgeçlär qarap, bäyäläp tordılar. Bäygegä yomğaq yasalıp, Tuqay turında iñ yaxşı däres birüçeneñ kem ikänlege dä açıqlandı. Tobol däwlät pedagogiä institutı dotsentı Klim Sadıykov: “Yaña texnologiä ısulları qullanğanğa berençe urınnı Yalutr rayonınıñ Yana At'yal mäktäbe uqıtuçısı Zölfiä Kalgamanovaga birdek”, -dide.
Yalutr rayonı Yaña At'yal mäktäbeneñ tatar tele häm ädäbiäte uqıtuçısı Zölfiä Kalgamanovanıñ därese “Tuqay mäñge yäşi bezneñ küñellärdä” dip ataldı. Rusiäneñ mäğärif ministrlığı 2007 nçe yılğa qädär barlıq mäktäplärne dä internet belän totaştırıp beterergä tırışaçaqbız dip ışandırsa Yaña At'yal uquçıları küptän inde internet çeltärendä.
Tömän ölkäse töbäge mäğärifen üsterü institutında ütkän “İ tuğan tel, i matur tel” dip atalğan bu festival'-bäygene yomğaqlağanda berençe, ikençe, öçençe urınnı alğan uqıtuçılarğa diplomnar häm aqçalata büläk tapşırdılar. Şulay uq ciñüçelär Gabdulla Tuqaynıñ tuğan könendä- 26 nçı aprel' könne Tömän ölkä filarmoniäsendä bulaçaq Tatarstan däwlät cır häm biü ansamble konsertın da buşqa qarayaçaqlar. Konsertnı oyıştıruçı “Miras” xäyriä fondı başqarma mödire Färit Xäkim alarğa çaqıru biletları tapşırdı.
Nail Alan, Tömän
