Tatarstanğa xezmät itäçäk awıl xucalığı belgeçlären Şotlandiädä äzerläyäçäklär. Üzebezdä genä äzerlärlär ide dä – anıñ buyınça uqıtuçı belgeçlär yuq ikän. Bezdä ğomumi belem genä birälär. Çüp östenä çümälä digändäy, Şotlandiädä belem alu öçen ingliz telen belergä kiräk. Şuña barlıq grantnı otuçılar, yäğni çit ilgä belemnären arttırırğa kitärgä layıqlı dip tabılğannar, başta 2-3 ay däwamında çit tellärne öyränergä tieş bulaçaqlar.
Sişämbe könne Tatarstan Ministrlar Kabinetında uzğan matbuğat oçraşuında, çit tellärne tiz arada öyränü öçen maxsus üzäk tözeläçäk dip belderdelär TR mäğärif häm fän ministrı Räis Şäyxelislamov häm anıñ urınbasarı Lyubov' Ovsienko.
Çit il häm Rusiädä belem alu, belem kütärü häm stajirovka mömkinlege dürt törkem öçen qaralğan. Studentlar, aspirantlar häm yäş ğalimnär – berençe törkem, ikençe törkemgä yuğarı uqu yortları ğalimnäre häm uqıtuçılar kerä. monnan tış oyışma citäkçeläre belän aksionerlıq cämğiät direktorlar Şurasınıñ bäysez äğzaları bar. Şulay uq däwlät xezmätkärläre dä üz belemnären kütärä alaçaq. Alar dürtençe törkem. Barlığı 2006 yılnı 750гә yaqın belgeç belem alır dip farazlana. Studentlar, aspirantlar häm yäş ğalimnär awıl xucalığı, tözeleş, sälämätlek saqlaw, mäğärif, arxitektura yunäleşläre buyınça uqırğa häm kandidatlıq dissertatsiälären yaqlarğa cibärelä.
Räis Şäyxelislamov äytüençä, älege proyektnı tormışqa aşıru maqsatınnan dokumentlar äzerlängän, barısı da eşlängän.
Grantlar alu öçen bäyge ike öleştän toraçaq. Başta dokumentlar tapşırıla, Tatarstan Fännär akademiäse prezidiumı, oyışma citäkçeläre, Tatarstan Prezidentı qarşındağı däwlät xezmäte oyışması, munitsipal' berämleklär başlıqları täqdim itä. Annan proektnı tormışqa aşıruçı komissiädäge büleklär här ayırım keşe buyınça qarar qabul itä.
Monnan soñ bäysez ekspertlar äñgämä ütkärä, test uzdıra. İyün başına näticälär bilgele bulaçaq dielde matbuğat oçraşuında.
Studentlar inde iyül avgustta uqırğa kitär dip farazlana.
Landış Xarrasova
