Başqortstannan xärbi xezmätkä çaqırılğan ber xärbi tuqmalğan. Ul Marat Garifov. Marat xärbi xezmätkä Ufadan çaqırılğan, Tuladağı hawa-desant ğäskärlärendä xezmät itkän. Ul Pskov ölkäsendäge Vladimir lagerında atu buyınça künekmä yasağan waqıtta tuqmalğan. Atu normalarına sıymağanı öçen 33842 xärbi çast'nıñ ştab başlığı mayor Sergey İsaev anıñ çigäsenä tipkän. Añın yuğaltqan yegetne Krasnıy Strug xastaxanäsenä salğannar, oçqıç belän Pskovtan neyroxirurg kitertep operatsiä yasağannar. Artaban Sankt-Peterburgtağı xärbi-meditsina akademiäsenä küçergännär. Maratnıñ çigä söyäkläre çärdäklängän, mienä zıyan kilgän. Çigä söyägen tazartqannan soñ başında yodrıq sıyışlı tişek xasil bulğan. Anı maxsus plastinka belän qaplap quyğannar. Yegetkä tağı ber operatsiä yasalaçaq. Marat Garifovnıñ bu xälgä taruı turında tuğannarına xärbi türäläre tügel, ä ber xezmättäşe käräzle telefon aşa xäbär itkän. Başta yeget häm tuqmawğa şahit öç xärbi döreslekne yäşerergä tırışqannar. İnde alar bu xaqta täfsilläp söylägännän soñ “suğış çuqmarı” mayorğa cinayät eşe quzğatılğan. Aña öç yıl buyı bu “batırlığı” turında räşätkä artındağı bülmädäşlärenä söylärgä turı kilü ixtimallığı yanıy.
Mönir Wafin,Ufa
