Accessibility links

Кайнар хәбәр

Ural xalıqları Forumı bulıp uzdı


Yekaterinburg şähäreneñ Ural däwlät taw universitetı binasında Ural xalıqları Forumı bulıp uzdı. Forum Nikita Demidovnıñ tuuına 350 yıl tuluğa bağışlanğan taw-sänäğät dekadası qısalarında oyıştırıldı.

Ural däwlät taw universitetı başqa uqu yortları arasınnan ezlekle milli säyäsät alıp baruı belän ayırılıp tora. Universitet qarşında millätara berdämlek üzäge eşläp kilä. Bu üzäkkä bügen Sverdlovski ölkäsendä eşläwçe unöç milli oyışma kerä.

Monnan ike yıl elek oyıştırılğan bu xäräkät başqortlarnıñ ciñel qulı belän başlanıp kitte. Kürşe Başqortstan respublikasınnan biregä kilep uqırğa teläwçe yäşlär küp bulğanlıqtan, Başqortstannıñ Uraldağı daimi wäkile Näfisä Tyumenseva universitet citäkçelege belän bik tığız elemtädä eşli başlağan ide. Näfisä xanım iskä alğança, biregä uqırğa kilüçe yäşlär belän bergä alar başta başqort yäşläre üzäge, annan başqort-tatar yäşläre üzäge tözegännär.

Başqort yäşläre misalında universitetta başqa millättän bulğan studentlar da üzläreneñ yäşlär milli oyışmaların buldırdılar. Universitet citäkçelege ölkä külämendä eşläp kilgän milli oyışmalar belän elemtägä kerep, alarnı yäşlär oyışmaları belän xezmättäşlekkä çaqırdı. Şul waqıttan birle biredä törle millätara çaralar oyıştıru matur ğädätkä äwerelde.

Nikita Demidovnıñ tuuına 350 yıl tuluğa bağışlap, taw-sänäğät dekadası qısalarında uzdırılğan Xalıqlar Forumına Sverdlovski ölkäse xökümäte äğzaları, törle milli oyışmalar citäkçeläre, deputatlar, jurnalistlar çaqırılğan ide. Forum qısalarında Sverdlovski ölkäsendä tolerantlıq kul'turasın üsterü mä’säläläre buyınça tügäräk östäl häm matbuğat konferensiäse bulıp uzdı.

Ölkä xökümäte äğzası Semen Spektor, forumda çığış yasağanda, yarım şayartıp, uqu yortınıñ isemen “taw-säyäsät universitetı” dip üzgärtergä waqıt citte, sez kiläçäk öçen buldıqlı citäkçelär genä tügel, säyäsi yaqtan köçle belemgä iä bulğan belgeçlär tärbiälisez, dide.

Universitet rektorı Nikolay Kosarev, üze citäklägän yuğarı uqu yortınıñ milli säyäsät buyınça alıp barğan eşläre küz buyaw öçen tügel, ä kiläçäk öçen kiräk dip belderde. Anıñ äytüençä, yäş buınnıñ milli añ, milli ğorurlıq xisläre belän tärbiälänep, ber-bersen xörmät itep yäşäwe keşelek öçen iñ qäderle bulğan xalıqara duslıq, tınıçlıqnıñ töp nigeze.

Forumğa kilüçelär iğtibarına student yäşlär milli oyışmaları köçe tarafınnan bik matur tamaşa-konsert täqdim itelde. Tamaşa Nikita Demidovnıñ patşa Ukazı belän Ural tawların buysındırırğa baruı turındağı teatral'läşterelgän küreneş belän başlanıp kitte. Konsertta törle tellärdä milli cırlar yañğıradı.

Forumğa kilüçelär öçen Ural asıltaşlarınnan bik matur zur yärminkä oyıştırıldı. Biredä taş-sın sänğäte ürnäklären, küptörle bizänü äyberlären, suvenirlar häm başqa küz qamaştırğıç äyberlär kürergä bula ide.

Fäwiä Safiullina, Yekaterinburg.

XS
SM
MD
LG