Accessibility links

Qırğızstanda xakimiätkä protest belderü çarasında meñlägän keşe qatnaştı


Qırğızstan prezidentı Qormanbäk Baqıevqa rizasızlıq belderü öçen şimbä könne Bişkäk üzägenä meñlägän keşe cıyıldı. Bakiev xakimiätkä kilgännän birle bu iñ ere protest çarası buldı. Baqıev xakimiätkä uzğan yıl, elekke prezident Askar Akaevnı kitergä mäcbür itkän uram cıyınnarı näticäsendä kilgän ide. Cinäyätçelek häm korrupsiäne beterü wäğdäläre belän. Bügenge protest belderüçelär şul uq, uzğan yılğı şiğärlärne qıçqırdı: "Korrupsiä, urlaw-talawlarnı tuqtatırğa" çaqırdı.

Çaranı oyıştıruçılarnıñ berse, Qobatbäk Baibolov yaña xökümätne xalıqnıñ ömetlären aqlamawda ğäyepläde:

"Rişwätçelär häm korrupsionerlarnı quarğa! Bezne xakimiätkä eşlärgä irek birmäwdä ğäyeplilär. Yänäse, aña äle ber genä yıl. Ber yıl eçendä xalıqnıñ tormışın yaxşığa üzgärtü qıyın, bez monı añlıybız, läkin ber yıl eçendä ömet tudırıp bula, bu xakimiät isä ömetlärne ayaq astına salıp tapyı," di Qobatbäk Baibolov.

Bügenge çaranı oppozitsiädäge 50gä yaqın firqä häm ğäyre-räsmi oyışma oyıştırdı. Qayber mäglümätlärgä qarağanda anda 10 meñläp keşe qatnaşqan. Alar arasında uzğan atna ğına xakimiättän kitkän Almazbäk Atambaev kebek keşelär dä bar ide:

"Bez üzgäreşlär taläp itäbez. Xakimiät xalqı turında uylarğa tieş, anı mäydanğa quıp çığarırğa tieş tügel tügel, ul qaraqlarnı quarğa tieş, xalıqnı burlardan saqlarğa tieş. Burlarnı häm cinäyätçelärne quarğa", di uzğan atna ğına rizasılıq belderep xökümättän kitkän Almazbäk Atambaev.

Berazdan mäydanda kötmägändä Baqıev üze päyda buldı, xalıq anı sızğırıp qarşı aldı. Bakiev berni üzgärmägän diyüçe säyäsmännärne suqırlar dip atadı:

"Bez – min, prezident, premier-ministr Kulov, xökümät belän bergä il öçen, sezneñ öçen eşlibez. Xalıqnıñ tormışın yaxşırtu, eş urınnarı buldıru, sezneñ öçen, tınıçlıq öçen. Bügenge çaranıñ tınıç qına betüen telim, min sezneñ belän, räxmät!" di Qırğızıstan prezidentı.

Şunnan soñ protest belderüçelär 12 taläptän torğan isemlegen uqığannan soñ, protest tämamlandı. Läkin ul soñğısı bulmas kebek. Oppozitsiä xökümätkä ber ay waqıt birde. Taläplär ütälmäsä, alar Maynıñ 27sendä tağın ber protest çarası ütkäräçägen belderde.

ali ğilmi
XS
SM
MD
LG