4 mayda Ufa şähäre xakimiäte çirattağı tapqır tatar biznesmennarı isäbenä tözelüçe tatar gimnaziäsen cimertü öçen Ufanıñ Mäcit Ğafuri isemendäge park zonasındağı gimnaziä kompleksı yanına awır cimerü texnikaları kitertte. Xäyer, formal''-yuridik küzlektän qarağanda gimnaziä binası yanına texnikanı arbitraj mäxkamäse pristavları kiterde. Ämma, eçkersez, “bez protokolov” söyläşkändä, şul uq pristavlar xakimiätlärneñ bu mäs’älädä bertuqtawsız basım yasawları, aşıqtıruları turında äytälär.
4 mayda cimerü texnikaları gimnaziä binası yanına kilgänçe, tatar milli oyışmaları citäkçeläre, idärä äğzaları binağa baru yullarına transparantlar totıp bastılar. Tatar gimnaziäsen cimertmäw ştabı başlığı professor Mäcit Xucin häm Bötendönya tatar Kongressı başqarma komitetı äğzası, Başqortstan tatarları milli-mädäni moxtäriäte citäkçese, älege binanı tatar balalarına büläk itep birüçe Ramil Bignov türälär belän söyläşülär alıp barğanda binanı saqlawçı tatarlar Ğabdulla Tuqaynıñ ülemsez “Tuğan tel”yen cırlıy başladılar. Qayandır garmun tartuçılar da kilep çıqtı. Türälär tatarlarnıñ çigenmäyäçägen, taralmayaçağın añlağaç, alar cimerü maşinaların bina yanınnan alıp kittelär. Şulay itep, 20 million sum aqça salınğan tatar gimnaziäse binası älegä cimerelmiçä qaldı. Ozaqqamı? Monısı inde tatarlarnıñ berdämlegenä, ruxi nıqlığına da bäyle. Bu uñaydan Çıñğız xannıñ ber ğibrätle süzlären iskä alırğa bula: “Şähär stenalarınıñ nıqlığı – anı saqlap suğışuçılarnıñ nıqlığına tigez”, - digän ul. Älbättä, bu oçraqta süz ber Ufa yäisä Başqortstan tatarlarınıñ ruxi nıqlığı turında ğına barmıydır. Ramil Bignov äytüençä, ägär bu mäs’älädä ciñeläbez ikän – bu tatarnıñ ciñelüe bulaçaq.
Kärim Yawış, Ufa
