Başqortstannıñ Bäläbäy şähärendäge tatar gimnaziäse östendä çirattağı tapqır qara bolıtlar quyıra. Başqortstan Mäğärif ministrlığı danlıqlı gimnaziägä kiläçäktä eşläw öçen akkreditatsiä birüdän baş tartqan. Bu xaqta “Azatlıq” xäbärçesenä tatar gimnaziäse direktorı Nurmöxämät Xösäenov xäbär itte.
“Bäläbäy tatar gimnaziäse bıyıl üzeneñ unberençe uqu yılın tämamlıy, di Nurmöxämät äfände. – Şuşı unber yıl - tatar gimnaziäsen saqlap qalu öçen köräş yılları buldı. İke yıl elek, törle säbäplär tabıp, gimnaziägä litsenziä birüdän baş tartqannar ide. Ber yıl elek mäxkämägä möräcäğät itü belän yanaw aşa, anı aluğa ireşte gimnaziä kollektivı. Ä litsenziä ber yılğa totqarlanu säbäple, anıñ attestatsiä möddäte dä çıqqan ide. Küp tartqalaşa torğaç, Başqortstan Mäğärif ministrlığı gimnaziäne attestatsiäläü könen aprel' ayı azağına bilgeläde”.
Nurmöxämät Xösäenov süzlärençä, 28 aprel'dä biregä kilgän attestatsiä komissiäse tatar gimnaziäseneñ eş däräcäsen tikşerep, anı attestatsiälängän dip tanıy häm attestatsiä öçen Mäğärif ministrlığı
türälärenä täqdim itä. 4 may könne Başqortstan Mäğärif ministrlığınıñ attestatsiä komissiäse utırışı Bäläbäy tatar gimnaziäse mäs’äläsen qarağan. Ämma Nurmöxämät äfände äytüençä, älege utırışta qatnaşuçılar, yäğni mäğärif ministrı urınbasarı İldar Aetkulov citäkçelegendäge komissiä äğzaları “akkreditatsiägä bulğan üteneçne kire qağarğa” digän qarar çığara. Monıñ säbäben alar bik ğadi genä añlata. İmeş, Bäläbäy tatar gimnaziäseneñ iseme döres tügel ikän. Mäğlüm buluınça, bu uqu yortınıñ tulı iseme “sänğät bülekçäle tatar gimnaziäse” dip atala. Menä şul isemneñ “sänğät bülekçäle” digän öleşe qanunğa turı kilmi, dip añlatqan mäğärif ministrlığı wäkilläre. İmeş, gimnaziä iseme, bernindi quşımtalarsız, fäqät “gimnaziä” dip kenä yazılırğa tieş ikän.
Nurmöxämät Xösäenov belderüençä, Başqortstan Mäğärif ministrlığınıñ dälile bernärsägä dä nigezlänmägän. “Bernindi qanunda da gimnaziä isemen quyuğa bäyle ayırım taläplär yuq, - di Nurmöxämät äfände. – Monı bez barı tik Bäläbäy tatar gimnaziäsenä qarata çirattağı üçläşü ğämäle dip kenä bäyälibez. Bäylänergä başqa säbäp taba almağaç, xäzer gimnaziäneñ isemendä xata tapmaqçılar”.
Şulay itep Bäläbäy tatar gimnaziäse bıyılğı uqu yılı tämamlanu aldınnan tağın ber problema aldında torıp qaldı. Uqu-uqıtu eşlärendä başqalarğa ürnäk bulğan, yaxşı ölgereşkä ireşüçe tatar gimnaziäse kollektivı Başqortstan mäğärif ministrı urınbasarı İldar Aetkulov citäkçelegendäge attestatsiä komissiäse däğwälarınıñ döres tügellegen isbat itäçägenä häm barıber akkreditatsiä aluğa ireşäçägenä ışana.
