AQŞ üzäk küzläw idaräse Goss bu wazıyfasında 2 yıl da eşlämäde äle. Anıñ kötelmägändä kitüe säbäpläre äytelmi.
Äle 2004-neñ avgustında, CİA 2001-neñ 11-nçe sintäber terror höcümnärenä häm Ğiraq suğışına bäyle citeşsezleklär säbäple qatı tänqit utına totılğanda prezident George Bush "Porter Gossnı älege möhim wazıyfa öçen zarur bulğan kiñ täcribägä iä, keşe" dip täqdim itte. Ul anı "CİAnıñ yäşeren xezmätendä distä yıl eşlägän elekke armiä küzläw ofitserı, CİAnı köçäytü öçen nişlärgä kiräk ikänen belüçe keşe" dip täqdim itkän ide.
Comğa könne isä Bush Aq Yortta "Mödir Porter Goss Üzäk Küzläw İdaräse mödire wazıyfasınnan kitüe turında ğariza tapşırdı. Min anı qabul ittem" dide.
Goss kitüenä bernindi añlatma da birmäde. Bush häm xäbärçelär aldında ul "Sezgä idarä bil yaxşı dip isäpläwemne citkeräsem kilä. Min çınnan da bez eşebezne bik nıq yaxşırttıq dim isäplim" dide.
Ämma Gossnıñ bu wazıyfadağı ozaq bulmağan eşçänlege şaqtıy qıyım häm anı tänqitläwçelär dä citärlek ide.
Qayber yäşeren xezmät ofitserları anı küralmadı bulsa kiräk, häm yuğarı citäkçelektäge küp kenä xezmätkärlär wazıyfalarınnan kitte.
Reformalar näticäsendä CİAnıñ yaña buldırılğan Däwlät iminlek mödire qaramağında eşli başlawı da kierenkelekkä säbäp buldı.
Gossnıñ älege wazıyfağa bilgelängän John Negroponte belän fiker ayırmalıqları buluı, Negropontenıñ CİAdağı küp kenä analitiklarnı başqa ber iminlek xezmätenä küçerüennän soñ alarnıñ tağın da kiskenläşüe turında xäbärlär buldı.
Gossnıñ kitüe säbäbe nindi genä bulmasın, Bush administratsiäsendäge yuğarı räsmilär Waşington Post basmasına bu turıda qarar inde berniçä ay elek ük bar ide dip belderde.
Gazeta yazuınça, Aq Yort yaqlawında Negroponte uzğan ayda Goss belän oçraşqan häm aña wazıyfasınnan kitärgä turı kiläçägen äytkän.
Bu soñğı ber ay eçendä genä dä Aq Yortnıñ şundıy yuğarı wazıyfadağı öçençe citäkçene almaştıruı buldı.
Naif Aqmal, Praga.