Bu könnärdä Yekaterinburg şähärendä studentlar icatı festivale bulıp uzdı. Festival' Sverdlovski ölkäse häm Tatarstan respublikası yuğarı uqu yortlarınıñ professional' mäğärif ölkäsendä bergäläp eşläw buyınça Konsorsium tözü turında qul quyğan Kileşü qısalarında oyıştırılıp, Tatarstan respublikası belän Sverdlovski ölkäse arasındağı räsmi mönäsäbätlär urnaşuğa un yıl tuluğa bağışlandı. Tatarstannıñ Uraldağı daimi wäkile urınbasarı Xäydär Gıyl'fanov xäbär itkänçä, bu çaranı oyıştıruda ike töbäkneñ dä yuğarı uqu citäkçeläre küp köç quydılar.
Festival'dä qatnaşırğa dip Qazannan illedän artıq student kilde. Alar arasında Qazan energetik universitetınıñ “Duslıq” isemle cır häm biyü ansamble, Qazan finans-iqtisadi institutınnan “Dan” isemle şou-balet törkeme, Tatar däwlät gumanitar pedagogik universitetınnan “Kukaryamba” komik törkeme, Qazan däwlät universitetınıñ cır häm biyü kollektivları, mini-futbol komandası bar ide.
Öç kön buyı barğan festival'neñ programması bik bay häm tirän eçtälekle buldı. Festival' qısalarında Yekaterinburg häm Qazan studentları arasında duslarça yarışlar, mini-futbol turnirı, törle oçraşular, sletlar uzdı. Öç kön rättän oyıştırılğan urtaq konsert programmaları Yekaterinburgnıñ mädäniät saraylarında ğına tügel, suğış veterannarı gospitalendä dä uzdırıldı. Gospital'dä däwalanuçılar şundıy zur bäyräm oyıştırğan öçen Tatarstannıñ Uraldağı daimi wäkillegenä häm yuğarı uqu yortları citäkçelärenä olı räxmätlär belderdelär.
Qazan yuğarı uqu yortlarınıñ icat häm sport kollektivlarınnan tış, festival'dä Tatarstan respublikasınıñ studentlar Ligası häm rektorlar şurası qarşında eşläp kilgän tärbiä eşläre buyınça koordinatsion sovet wäkilläre dä qatnaştı.
Tatar däwlät gumanitar pedagogik universitetınıñ dürtençe kurs studentı İlsur Xismätullin Tatarstan respublikasınıñ Studentlar Ligası wäkile bulıp kilgän. Yekaterinburgta üz yäştäşläre belän aralaşıp, tärbiä eşläre buyınça törle kiñäşmälärdä qatnaşqannan soñ, ul üzeneñ tä'sirlären Ural cirendä studentlar üzidaräseneñ yuğarı däräcägä quyıluı turında söyläwdän başladı. “Ural härwaqıt Rossiäneñ demokratiä üzäge bulıp sanaldı, - dide ul, - şuña kürä biredäge yuğarı uqu yortları törle yaqlap bik progressiv räweştä alğa kitkän, alardan öyränä alırlıq närsä bik küp”.
Şul uq waqıtta Tatarstan respublikasında yäşlär säyäsäte, bigräk tä student yäşlär tärbiäläw säyäsäte bik ziräk alıp barılğanın iskärtep, İlsur Xismätullin ike zur töbäk studentlarınıñ kiläçäktä bergäläp eşläp, täcribä urtaqlaşıp yäşäyäçägen bik uñay küreneş dip atadı.
Anıñ fikeren Tatar däwlät gumanitar pedagogik universitetınıñ tärbiä eşläre buyınça prorektorı Alsu xanım Şäräfieva da rasladı. “Bu şähärdä min inde öçençe tapqır, - dide Alsu Fatixovna, - biredä tärbiä eşläre bik alğa kitkän. Bez monda täcribä urtaqlaşırğa yöribez. Xäzer inde urtaq eşlärebezgä nigez salındı, kiläçäkkä küp kenä urtaq proektlarıbız bar”.
“Studentlarda sotsial' aktiv şäxes tärbiäläw” digän temağa uzdırılğan urtaq seminarnıñ näticälären ike yaq ta bik uñay bäyäläde. Bu seminarda studentlar arasında fänni, gumanitar, mädäniät häm sport ölkäsendä xezmättäşlekkä nigez salındı. Şulay uq tärbiä eşläre buyınça prorektorlar şurasınıñ studentlar üzidaräse nigezläre turında urtaq cıyentığın çığaru östendä eşli başlarğa kileşelde.
Qazan häm Yekaterinburg şähäre yuğarı uqu yortları arasındağı Konsorsium nigezendä xezmättäşlek itü änä şundıy bik kiräkle eşlärdän başlandı. Ural däwlät universitetı rektorı Vladimir Tret'yakov, Rossiädäge törle yuğarı uqu yortları belän tığız elemtädä torsaq ta, Konsorsium kebek citdi Kileşü nigezendä eşli başlawıbız äle berençe tapqır, dip belderde. Bügen bezneñ studentlarıbıznıñ oçraşuı, alarnıñ kiläçäktä tığız xezmättäşlektä aralaşıp yäşäyäçäge bezneñ xezmätneñ yuqqa tügel ikänlegen açıq kürsätte, dide ul.
Tatarstannıñ Uraldağı daimi wäkile Rawil Bikbov fikerençä, ike yaqnıñ da rektorlar şurası Tatarstan belän Sverdlovski ölkäse arasındağı üzara mönäsäbätlärne yaña basqıçqa kütärde häm yaqın kiläçäktä tağın da zurraq xezmättäşlekkä yul açtı.
Fäwiä Safiullina, Yekaterinburg
