Accessibility links

Кайнар хәбәр

Äl-Qaidä Europada Ğiraq öçen ğisyançılar tuplawın däwam itä


Kilgän xäbärlärgä qarağanda, Äl-Qaidä häm anıñ tarafdarları Europada aqça cıyu, terrorçı-intiharçılar tuplaw eşen däwam itä. Uzğan atndada Britaniäneñ iminlek xezmätläre şundıy ber çeltärne faş itep, 8 keşene qulğa aldı. Belgeçlär fikerençä, andıy çeltärlär Europanıñ başqa illärendä dä bar.

Uzğan çärşämbedä Britaniäneñ iminlek xezmätläre bar il buylap kiñ külämle tentü operatsiäsen başqarğan. Äl-Qaidägä aqça cıyıp häm äğzalar tuplap yatqan çeltärlärne faş itü maqsatı belän. Patşalıqnıñ törle şähärlärendä barğan ğämällärdä, ğadi kiemgä kiengän agentlarnı da sanap, barlığı 500läp keşe qatnaşqan.

Näticädä 8 keşe qulğa alınğan. Çığışları belän Liviädän. Berse çınlap ta, xäyerçe illärdäge möselmannarğa açqa cıya torğan xäyriä oyışmasında eşli ikän. Ämmä politsiä fikerençä, bu törkemneñ töp şögele – cihadçılar äzerläw.

Monıñ işe xäbärlär äle tege äle bu ildän yış kilep tora. Bu närsä digän süz – iminlek xezmätläreneñ buldıqlılığımı, ällä kiresençä, buldıqsızlığımı? Şotlandiäneñ St.Andrews universitetında Terrorçılıq öyränü üzäge citäkçese Paul Wilkinson:

"Minemçä, Europa illärendä politsiä, iminlek xezmätläre andıy eşçänleklär turında yaxşı belä häm alarnı faş itergä tırışa. Läkin uñış turında söylärgä äle irtä, eşlise eş äle küp, şuña bezgä uyaw bulırğa kiräk" di Paul Wilkinson.

Britan politsiäse äytüençä, qulğa alınğan 8 keşeneñ berse Süriädä künegülär ütkän, ikese – Berläşkän Millätlärneñ terrorçılar isemlegendä. Bu törkem Ğiraq öçen ğisyançılar häm aqça tuplağan dielä.

Belgeçlär fikerençä, monıñ işe törkemnär Europanıñ küp kenä şähärendä bar. Ämmä alarnıñ Äl-Qaidä belän ni däräcädä bäyle buluı turında äytüe qıyın, di Southampton universitetında Terrorçılıq belgeçe Francis Gregory:

"Britaniädä Ğiraqqa ğisyançılar tuplaw eşe turında räsmilär belä. Monıñ Äl-Qaidä belän älbättä nindider bäyläneşe bar, tik bu bäyläneşne açıqlaw qıyın" di Francis Gregory.

Paul Wilkinson äytüençä, mondıy ğisyançılar tuplaw xäräkäte bigräk tä Europanıñ küp möselman yäşägän illärendä köçle: Fransiä, Germaniä, İtalia häm älbättä Britaniädä.

Şul uq waqıtta Londonnıñ Xalıqara Strategik tikşerenülär institutı belgeçe Christopher Langton süzlärençä, Ğiraqtağı ğisyançılarnıñ 5-10 protsentı ğına Europadan, zur öleşe isä - Yaqın könçığış häm Könyaq Aziädän.

ali ğilmi
XS
SM
MD
LG