Bu könnärdä Yekaterinburg şähäreneñ Yuğarı İset mädäniät sarayı binasında bik zur tantana bulıp uzdı. Tantana Tatarstannıñ Uraldağı daimi wäkillege eşli başlawğa un yıl tulu häm wäkillek binası urnaşqan Yuğarı İset rayonı tözelügä siksän yıl tulu waqiğasına bağışlandı. Biredä qatnaşırğa dip Qazan şähäreneñ İdel buyı rayonı xakimiäte başlığı Rawil Kärimov häm Tatarstan respublikası mädäniät ministrlıysınnan Rafinad Salaxov citäkçelegendä altı keşelek delegatsiä kilgän ide. Delegatsiä sostavında cırçılar, biüçelär, näfis süz ostaları buldı. Rafinad äfände äytüençä, Tatarstan mädäniät ministrlığı häm respublikanıñ mädäni-ağartu eşläre buyınça fänni-metodik üzäge çit töbäklärdä yäşäwçe millättäşlärebezgä yärdämgä kilergä härwaqıt äzer. Ozaqlamıy, İlham Şakirov isemendäge fond açılğaç, millättäşlärebezgä yärdäm itü mömkinçelege tağın da artaçaq, dide ul.
Tatarstan qunaqları tantanağa cıyıluçılar aldında Sverdlovski däwlät konservatoriäse artistları, Yekaterinburg şähäre icadi kollektivları belän bergä bik matur qatnaş konsert quydılar. Tamaşaçılar bigräk tä Tatarstannıñ atqazanğan artistı Ferdnnand Fätxi çığışın yaratıp qabul ittelär. Cırçı üze dä bu yaq tamaşaçısın yaqın itüen belderde.
Konsertta tatar xalıq köylärennän tış, citdi klassik muzıka häm estrada cırları yañğıradı.
Yekaterinburgnıñ Yuğarı İset rayonı xakimiäte başlığı Aleksandr Yaqob häm Qazannıñ İdel buyı rayonı xakimiäte başlığı Rawil Kärimov kiläçäktä aralaşıp torırğa, ike rayon arasındağı duslıqnı nığıtıp qına qalmıyça, ike şähär arasında da duslıq cepläre suza başlarğa kileştelär.
Tatarstannıñ Uraldağı daimi wäkile Rawil Bikbov, ike tügäräk datanı bergä zurlap uzdıru başlanğıçınıñ da näq menä şuşı fikerdän kilüen äytte. Rawil Zöfär ulı Yekaterinburg belän Qazan kebek ike zur, qüätle şähär arasındağı mönäsäbätlärne yaña däräcägä kütärü waqıtı citte dip sanawın belderde.
Yekaterinburg şähärendä Sverdlovski ölkäse belän Tatarstan respublikası arasındağı räsmi mönäsäbätlärgä un yıl tuluğa bağışlanğan çaralar däwam itä. 17 iyün könne “Tatarstan – Ural: gumanitar xezmättäşlek täcribäse häm strategiäse” digän dissiplinalar simpozium uzdırılaçaq. Simpoziumğa Qazan, Mäskäw, Çiläbe şähärlärennän qunaqlar çaqırılaçaq. Bu könnärdä şuşı zur çaranı oyıştıru eşläre alıp barıla.
Fäwiä Safiullina, Yekaterinburg
