Bügenge könnärdä Putin citäkçelegendäge Rusiä iqtisat häm säwdä ministrlığı, RFnıñ Federal' Cıyılışı federatsiä şurası, Bäysez däwlätlär berlege häm Peterburg xökümäte oyıştırğan 10nçı xalıqara iqtisadıy forumı bara. Peterburg 13 - 14 iyün könnärendä iqtisadıy forumda qatnaşuçılarnı qabul itte. Anda respublikanıñ xökümät başlığı Röstäm Miñnexanov citäkçelegendäge Tatarstan delegatsiäse dä qatnaşa. Miñnexanov belän kitüçelär arasında, xökümät başlığınıñ berençe urınbasarı – iqtisat häm sänäğät ministrı Boris Pavlov häm başqa vedomstvo, ministrlıq wäkilläre dä bar dip xäbär itä “Tatar - inform” mäğlümat agentlığı. Ştıklap sanasaq Tatarstannan Peterburgtağı 10 iqtisadıy forumğa 60qa yaqın keşe kitkän bulıp çığa. Älege forumnı 400gä yaqın jurnalist yaqtırta, alarnıñ kübese bu zur çaranı Putin açuı xaqında xäbär ittelär inde. 15 iyüngä qädär baraçaq zur türälärneñ cıyılışında şulay uq Rossiäneñ küp kenä ministrları, alarnıñ urınbasarları, BDB, yıraq çit il xökümäte wäkilläre qatnaşa. Tatarstanlılarnıñ forumda qatnaşu maqsatları – “İnnovatsiä qazanışları” häm “İnvestitsiä proyektları” kürgäzmälärendä Tatarstannıñ investitsiä häm innovatsiä proyektların täqdir itü. Kürgäzmädä Tatarstanlılar üz äyberlären 45 kvadrat mäydanğa cäyep salıp 9 innovatsiä proyektı kürsätkännär. Tatarstannan kitkän iqtisatçılarnıñ Qazanda qalğan urınbasarlarınnan bez şaltıratıp östämä mäğlümat almaqçı idek, tik berse dä ber närsä dä äytmäde. Barı “Bu eşlär bezgä qağılmıy, cawaplı keşelär Peterburgqa kittelär”- dip qırt kistelär. Forum qısalarında global'läşterüneñ xäzerge taläpläre, üsep kilüçe illärneñ köndäşlelek östenlekläre, Braziliä, Rossiä, Hindstan, Qıtay iqtisatınıñ ğomum tendensiäläre, investitsiä säyäsäteneñ yaña qoralları belän bäyle mäs'älälär turında fiker alışalar. Zur türälär cıyılğan iqtisat forumında qatnaşuçılarğa ayırım mädäni çaralar da äzerlängän. Delegatlar häm qunaqlar teploxodlarda Peterburg buylap säyäxätkä çığıp şähärneñ tarixi urınnarın, yaña, zamança tözelgän rayonnardağı maturlıqların qarap ütälär. Tatarstan delegatsiäse forumda qatnaşu belän bergä biredä uzaçaq keçeräk cıyılışlarda qatnaşırlar dip kötelä.
10 xalıqara külämdäge iqtisat forumında Tatarstannıñ xökümät başlığı belän “Tatneft'” kebek ere oyışmalarnı citäkläwçe başlıqlar Peterburgta Tatarstannıñ iqtisatınıñ kiläçäge öçen yöribez bez diebräk äytsälär, mondağılar wağraq eşmäkärlär üz säwdäläreneñ mäşäkate belän xökümät başlıqlarınıñ qaya yörgänen dä belmi, belergä dä telimilär buğay. Başlıqlarnıñ çittä yörgändä bezgä ciñelräk tä äle di alarnıñ qayberläre…
Röstäm İsxaqi
