Matbuğat oçraşuında Bötendönya tatar kongressı Başqarma komitetı räise Rinat Zakirov häm “Tatmedia” general' direktorı berençe urınbasarı Färit Şahiäxmätov qatnaştı. Matbuğat oçraşuında kübräk tatar yäşläre forumı qısalarında kütäreläçäk mäs'älälär xaqında süz bardı. Rinat Zakirov berençe forumnan ayırmalı bularaq bıyıl iñ töp problemalarnıñ berse – demografiä mä’säläsenä tuqtalaçaqların äytte. Uzğan yıl “Tatar ğailäse” digän programma buldırıldı kongressta dide. Tatar yegetläre häm qızların ber-berse belän tanıştırıp, matur ğailä qoru öçen eşlärgä kiräklegen belderde. Yauçılarnı eşkä cigü dä naçar bulmas ide dip assızıqladı. Şul uq waqıtta 90нчы yıllar başında oyıştırılğan Tatar yäşläre könnärendä yäşlär ber urında “İdel” lagerendä urnaşıp, ber-berse belän tanışıp, aralaşıp, kiçke uyınnar oyıştırıp xätta ğailä dä qorıp cibärälär ide. Forumda andıy mömkinlek yuq. Rinat Zakirov monı keşeneñ küplege belän añlattı. 600 keşene ber urında yäşätü mömkinlege yuq dide ul jurnalistlarğa. Şulay itep, yäşlärgä kiçlären aralaşu, fiker alışu nasıyp bulmas tösle.
Forumğa 16 yäştän 35 yäşkäçä millättäşlärebez çaqırılğan. Alarnıñ 180 yıraq häm yaqın çit illärennän, 350 Rusiä töbäklärennän, 100 Tatarstannan. Forumğa kilüçelär gel ber ük keşelär bulmasın öçen 70 protsentı yaña, 30 protsentı elek kilgän yäşlär buluı da şart itep quyılğan.
Forumnıñ tantanalı açılışı 22 iyün könne “Aq bars” yäşlär üzägendä bulaçaq. Şul uq könne yäşlär 6 seksiägä bülenep eşläyäçäk. Alarnıñ 3се Qazan milli mädäni üzägendä ütäçäk. Anda tatar tele, mädäniäte, din, massaküläm mäğlümat çaraları, yäşlärneñ säyäsi-ictimaği tormışındağı role, tatar ğailäse turında fiker alışu bulaçaq.
Seksiälärdä telägän härkem qatnaşa alsa, başqa çaralarda bu mömkinlek yuq. Şuña Rinat Zakirov forumda qatnaşırğa tezläwçe yäşlär bulsa aldan uq kongressqa möräcäğät itsennär dip belderde. Berniçä distä, yäğni 10-20 keşene kertü mömkinlege barlığın äytte.
Forum qısalarında şulay uq zamança tatar cır sänğäte turında diskussiä qaralğan. Şulay uq yäşlärne Tuqay belän bäyle bulğan Qırlay, Quşlawıç awıllarına alıp baraçaqlar, Qazan Saban tuyında qatnaşu da qaralğan.
Rinat Zakirov yaña saylanaçaq Tatar yäşläre forumınıñ byurosına zur ömetlär bağlawın äytte. Xäzergeseneñ eşçänlege belän bik ük qänäğät bulmawın da yäşermäde.
Bilgele bulğança, Tatar yäşläre forumı byurosınıñ yaña räise dä saylanaçaq. Bu urınğa inde nämzätlär bar ikän. Läkin alarnıñ isemnäre äle ser bulıp qala dielde matbuğat oçraşuında. Rinat Zakirovnıñ tel töbennän añlaşılğança, yaña räis itep küzdä totqan ber yeget häm ber qız bar. Anıñ berse Yäşlär forumınıñ räise bulsa, ikençese anıñ urınbasarı itep bilgelänäçäk. Älege nämzätlär belän inde küreşep söyläşülär dä bulğan.
Landış Xarrasova
