Accessibility links

Кайнар хәбәр

2014 yılda qışqı Olympia uyınnarı qayda uza ala, atnakiç Xalıqara Olympia komitetı şunı tikşeräçäk


Pänceşämbedä Şvetsariäneñ Lausanne şähärendä Xalıqara Olympia komitetınıñ çirattağı utırışı açıla, anda töp mäs''älälärneñ berse bulıp 2014-nçe yılğı qışqı Olympia uyınnarın ütkärügä däğwa itkän barlığı 7 şähärdän 3 yä 4 finalistnı saylaw tora. İsemlektä Rusiä, Qazağstan häm Gruziä şähärläre dä bar. İñ layıqlı dip tabılğan ciñüçe isä kiläse yılda iğlan iteläçäk.

2014-nçe yılğa qädär äle şaqtıy ğına ğömer kiçeräse bar kebek toyılsa da, Olympia uyınnarına kilgändä waqıt bik tiz ütä diärgä bula. Tağın 8 yıldan soñ üzendä qışqı yarışlarnı ütkärü telägen dönya buylap barlığı 7 şähär beldergän ide. Atnakiç şularnıñ kimendä 3-en yaman xäbär kötä - çiñüçeneñ kiläse yılda ğına bilgelänäçägenä qaramastan, köräşne xäzerge 7-dän barı tik 3 yä 4 kenä nämzät şähär däwam itäçäk.

İsemlektäge şähärlärneñ 3-se Olympia uyınnarın qunaq itü telägen berençe märtäbä belderä. Alar Rusiädän Soçi, Qazağstannan Almatı häm Gruziädän Borjomi. Moñardan tış anda Austriädän Salzburg, İspaniädän Jaca, Bolğarstannan Sofiä, Könyaq Koreädän Peyoñ-Çañ şähärläre dä bar. Olympia uyınnarın qabul itü öçen barğan yarışnıñ soñğı turına çığu ixtimalı Salzburg häm Peyoñ-Çañda şaqtıy zur, ämma qayber belgeçlär Rusiä könyağındağı Soçi mömkinleklären dä bik yuğarı bäyäli.

Olympia xäbärlären yaqtırıtıp kilgän aroundtherings.com yañalıqlar xezmäte möxärrire Ed Hula süzlärenä qarağanda, Soçi şähäreneñ äzerlek däräcäse Xalıqara Olympia komitetı wäkillärendä uñay tä''sir qaldırğan.

"Anda köçle xökümät yaqlawı bar, Soçidä sport çeltären üsterügä, qorılmalarnı täräqqi itügä federal'' programma belän 12 milliard dollar birelä. Mondıy teläk, mondıy säyäsi yaqlaw Olympia uyınnarına däğwa itü öçen bik möhim, bigräk tä Soçi oçrağında bar närsäneñ dä nuldän başlanuın iskä alğanda", dip añlata Soçi däğwasınıñ köçle buluın Ed Hula.

Qara diñgez buyında yatqan, xäzer Rusiäneñ töp yal itü urını sanalğan Soçi üzen "Här fasılğa da kileşkän qala" dip tanıtırğa tırışa. Älege şähär şulay uq Rusiä prezidentı Vladimir Putinneñ anda cäyge utarı buluı belän dä mäğlüm. Cılı yaqta urnaşuına qaramastan, Soçi 2014-nçe yılda qışqı uyınnarnı qunaq itügä däğwalıy. Eş şunda ki, annan ber säğät yulda Krasnaya Polyana digän sport üzäge urnaşqan, yarışlarnı şunda ütkärü planlaştırıla.

Ägär dä Soçi, pänceşämbedä soñğı turğa çığıp axırğı çiktä ciñüçe dip tabılsa, älbättä. Anıñ köndäşe, Gruziäneñ Borjomi şähäre mömkinleklären belgeçlär bik yuğarı bäyälämi, ä menä Qazağstannıñ elekke başqalası Almatı alay uq naçar xäldä tügel kebek. Ul Tianşan tawları itägendä urnaşqan häm andağı tabiğät şartları qışqı Olympia yarışların oyıştıru öçen bik qulay. Citmäsä, 2011-nçe yılda Almatı üzendä Aziäneñ qışqı uyınnarın qabul itäçäk, dimäk anıñ äle sovet çorında uq tanılğan sport qorılmaları çeltäre ul waqıtqa tağın da täräqqi ittereläçäk, digän süz.

Belgeçlär, köräşne däwam itäçäk şähärlär isemlegenä Salzburg, Peyoñ Çañ, Soçi kerep, dürtençe itep Almatı östälä ala, digän faraz belderä. Ä inde şular arasınnan berdänber ciñüçe Xalıqara Olympia komitetınıñ kiläse yılda yüldä Guatemala şähärendä uzaçaq 119-nçı utırışında iğlan iteler dip kötelä.

Kärim Kamal
XS
SM
MD
LG