Paqstan televideniäse, Talibannıñ elekke citäkçese Mullah Omardan digän tasma tapşırdı. Anda Omar Äfğanstannıñ zur öleşeneñ äle dä Taliban köçläre qulında bulğanın söyli. Häm Qabulda utıruçı, AQŞ tarafınnan yaqlanğan prezident Xamid Qarzainıñ xökümäte – ber qayçan da il belän idarä itä almayaçaq, dip belderä. Televideniädä Omar dip täqdim itelgän keşeneñ Helmad vilayätendä Taliban köçläre aldında çığış yasağanı kürsätelgän. Bäysez çığanaqlar tasmanıñ çın bulğanın raslıy almıy. Televideniä kanalı anı elektron poçta aşa alğanın xäbär itte. Ul arada äfğan generalı Rahmatulla Roufi, kiçädän birle koalisiä köçläre 48 ğısyançını üterde, dip belderde. Bäreleşlär Qandahar vilayäteneñ Panjwayi töbägendä bulğan. Kiçä AQŞ xärbi köçläre, Äfğanstannıñ könyağındağı xärbi çaralar waqıtında 80gä yaqın suğışçı üterelde, dip belderde.
