Accessibility links

Кайнар хәбәр

Omski “Tatar dönyası” gazetasınıñ çirattağı sanı çıqtı


Bu könnärdä Omskida näşer itelä torğan “Tatar dönyası” gazetasınıñ çirattağı 6 sanı dönya kürde. 8 bittän torğan bu aylıq basma Omski ölkäseneñ iñ yıraq poçmaqlarında yäşäwçe uquçılarına da citkerelep toruçı berdänber tatar gazetası bulıp tora. “Tatar dönyası” gazetası eşmäkär Tamir äfände Alimbaev isäbenä çığarıla häm aldan cıyılğan isemleklär buyınça poçta xezmäte aşa xalıqqa buşlay taratıla.

Bu sannıñ eçtälegenä kilgändä, anıñ berençe häm soñğı bitlärendä ölkädä ütkän Sabantuylar turında mäqälälär, bäyräm waqıtında eşlängän fotoräsemnär urnaştırılğan. İyün ayında Omski ölkäsendä Sabantuylar Tara rayonınıñ Säitovo häm Bol''şereç''ye rayonınıñ Ülänkül awıllarında ütte. Bu awıllarda ütkän bäyrämnär turında külämle mäqälälär Omski pedagogiä kölliäteneñ tatar tele uqıtuçısı Gölsinä Axmerova häm Taranıñ tatar üzäge metodistı İldar Mamatov tarafınnan yazılğan. İke mäqälädä dä Sabantuylarnıñ yuğarı däräcädä, oyıştırılğan töstä ütüläre, oyıştıru eşlärendä xalıqnıñ küpläp häm teläp qatnaşuı, awıl xalqınnan büläk cıyunıñ üze matur ber bäyrämgä äylänüe assızıqlanğan. Avtorlar ike awılğa da bäyrämnär ütkärüdä matdi yärdämneñ Omskinıñ Neft'' eşkärtü predpriätiese direktorı İldus Särvärov tarafınnan kürsätelüe turında belderälär.

Gazetanıñ ikençe bitendä Omski ölkäseneñ qayber tatar awıllarında ber kürkäm ğämäl– xäter könnäre ütkärelä başlawı turında mäqälä urnaştırılğan. Mondıy çara ütkäreläse awıllarda cäy başında xalıq kümäk köç belän ziratnı tözekländerü, cıyıştıru kebek eşlär başqara. Bilgelängän ber köndä zirat yanında kümäkläp Qor''än uqu, doğa qılu oyıştırıla häm şulay uq kümäk köç belän aş-su äzerlänä. Mäkälädä xäter könnäreneñ bıyıl Bol''şereç''ye rayonınıñ Tusqazan, Yälankül, Çernalı, Qaraqül häm Ülänkül awıllarında ütkärelüe turında yazılğan.

“Tatar dönyası” gazetasınıñ inde öçençe sanında rättän Musa Cälilneñ 100 yıllığı uñayınnan mäqälälär basılıp kilä. Bu sanda şağirneñ ulı Al''bert Cälilov turında “Tatarstan” jurnalınnan berniqädär qısqartılıp alınğan mäqälä urnaştırılğan. Gazetada may ayında Tömän şähärendä 9-nçı Söläymanov uquları qısalarında uzdırılğan fänni-ğamäli konferensiä turında da külämle genä mäqälä bastırılğan. Anda Tatarstan, Tömän ğalimnäreneñ häm Omski delegatsiäse wäkilläreneñ fikerläre urın alğan.

Gazetanıñ tağı ber säxifäsenä tuqtalıp ütäsem kilä. “Töşlärgä genä kergän güzäl şähär” digän baş astında çıqqan mäqälädä ölkä xakimiäte xezmätkäre Zifa Şarıypova küptän tügel Qazanğa yasağan säyäxäte turında yaza. Anda ul xıyalında yörtkän Qazan belän tanışuı, tarixi urınnarda buluı, şähärneñ güzällegenä soqlanuı turında xislänep häm ğorurlanıp yaza. Mäqäläne uqığanda Zifa xanım belän bergä şähär uramnarında yörgän kebek bulasıñ.

“Veteran yazmaları” digän baş astında Bol''şereç''ye rayon üzägendä yäşäwçe Şäwkät abıy İnoyatov awır tormış yulı – ätiseneñ Stalin zolımına elägüe, üzeneñ suğıştan awır yaralanıp qaytuı, annan soñ ğömeren balalar tärbiäläwgä bağışlawı turında yaza. Xäzerge waqıtta layıqlı yaldağı bu olpat veteran şiğerlär yazu belän mawığa, gazetada anıñ ber şiğere dä birelgän.

Gölçäçäklär tuğan telgä

İrken yul açsın ide.

Seberdäge tatarlarğa

Cırlarım oçsın ide.

dip belderä Şäwkät abıy tuğan telenä, üz xalqına bulğan mäxäbbäten.

“Mädäniät uçağı niçek yäşi” digän baş astında Omskida yäşäwçe otstavkadağı xärbi Asqat Quramşin ölkä milli-mädäni moxtariäteneñ bügenge xaläte turında borçılıp yaza. “Qızğanıçqa qarşı uzğan yılda anda eşlär moxtariät urnaşqan binanı saqlap qalu probleması belän şöğellänüdän yıraq kitä almadı... Ğomumän alğanda moxtariät tatar mädäniäteneñ üzäge bulırğa tieşter bit!? Anda barırğa keşelärneñ yöräge aşqınıp torırğa tieşter, labasa?”dip yaza Asqat äfände.

Gazetanıñ yañalıqlar rubrikasında milli häm cirle mäğlümat çaralarınıñ küptän tügel Qazanda oyıştırılğan II kongressında “Tatar dönyası” gazetasınıñ möxärrirläre qatnaşuı turında mäğlümat birelgän. Kongress barışında alar törle töbäklärdän kilgän qayber tatar gazetaları möxärrirläreneñ Omski gazetasına qarata fikerläre belän qızıqsınğannar. Qayber fikerlärne “Azatlıq” tıñlawçıları iğtibarına da citkeräsem kilä.

“Tatar dönyası” gazetasına qarata fikerlären Orenburgnıñ “Yaña waqıt”, Samaranıñ “Berdämlek”, Çuaşstan Respublikasınıñ “Waqıt” gazetaları baş möxärrirläre Fännür Gaysarov, Rafqat Ähliullin, Färit Gıybatdinov, “Region-Tömän” teleradioşirkate kommentatorı Nail Alan, Tübän Novgorod ölkäseneñ “Awılım xäbärläre” İcat yortı baş möxärrire Kamil Fätqullin belderdelär.

Rozaliä Sayganova, Omski

XS
SM
MD
LG