Accessibility links

Кайнар хәбәр

Ukraina prezidentı awır saylaw aldında - Yuğarı Radanı taratırğamı, yuqmı?


Sişämbedä Ukraina prezidentı Viktor Yuçenko xälitkeç qarar qabul itü aldında qalaçaq - anıñ Yuğarı Radanı taratıp, yaña saylawlar iğlan itü xoquqı bulaçaq. Parlament äle dürt ay elek kenä saylanğan bulsa da, anda älegä qädär xökümät xaqında kileşügä ireşelmäde. Ukraina konstitutsiäse isä elekke xökümät eşennän kitep 60 kön uzuğa, yañası qorılmasa prezident parlamentnı tarata ala, dip bilgeli.

Prezident Yuçenkonıñ asılda berniçä mömkinlege bar, ämma şularnıñ berse dä anıñ üze öçen hiç kenä dä uñay tügel. Däwlät başlığı bularaq ul, 60 kön eçendä xökümät qora almağan Yuğarı Radanı taratıp, yaña saylawlar könen bilgeli ala. Ukrainada parlament martnıñ 26-sında ğına saylanğan ide, ämma anıñ näticäläre ildäge ictimaği-säyäsi wäzğiatne tämam körçekkä genä teräde häm xäzer Yuğarı Radanı taratu, şunnan çığu öçen möhim adım bulır ide. Läkin Yuçenko öçen bu bik ük caylı çişeleş bula almıy - ul citäklägän "Naşa Ukraina" berläşmäse, aldağı saylawlarda, ägär dä inde alar bilgelänä qalsa, xäzergegä qarağanda da azraq yaqlaw qazanaçaq. Soñğı fiker beleşülär şunı kürsätä.

Şuña da Viktor Yuçenko xökümät qoruğa haman da ömeten yuğaltmıy. Şimbä könne yasağan atnalıq radiomöräcäğätendä ul, ildäge totrıqlılıq wä anıñ alğa baruı xaqına Yuğarı Rada belän tığız xezmättäşlek itäçägenä basım yasadı.

"Yaña xökümätkä möhim wä qatlawlı burıç yöklänäçäk. Ul iqtisadi täräqqiat ritmın saqlap, xalqıbıznıñ yäşäw şartların yaxşırtırğa tieş bulaçaq. Moña barı tik bik qatı eşläp kenä ireşü mömkin. Häm moña fäqät professionallär taqımı ğına ireşä ala. Şul taqımğa üzeneñ tar mänfäğätlärennän waz kiçkän, ildäge iqtisadi täräqqiat öçen cawaplılıqnı üz östenä alğan şäxes kenä citäkçelek itärgä tieş. Min ukrain säyäsätçeläreneñ ziräklegenä ömetlänäm", digän ide Viktor Yuçenko, Ukraina Yuğarı Radasınıñ yaña xökümät qora alırlığına ışanıp.

Xökümät xaqında kileşenmägän oçraqta da Yuçenkonı xäzerge Yuğarı Radanı qaldıra ala, ämma ul oçraqta ildäge xakimiat krizisı däwam ğına itäçäk, digän süz. Başqa ber mömkinlek bulıp "Naşa Ukraina"nıñ Yuçenko köndäşe Viktor Yanukoviç citäklägän Töbäklär partiäse belän berektäşlek qora aluı tora. İke yıl elek mondıy täräqqiatne küz aldına da kiterep bulmadı - mäğlüm "äflisun inqilabı" Viktor Yuçenkonıñ näq menä Yanukoviç belän köräşüe nigezendä bulğan ide.

Bu oçraqta "Naşa Ukraina" wäkilläre xätta yaña xökümättä dä qatnaşa ala. Ämma mondıy yulnı saylaw "äflisun inqilabı"nıñ tarafdarları arasında tirän töşenkelek xise uyatıp, alarnıñ Yuçenkodan küñele qaytuı ixtimalın arttıra.

Yuğarı Radanı bernindi şik-şöbhälärsez taratuğa barı tik ber genä säyäsätçe - Viktor Yuçenkonıñ elekke köräştäşe, mäğlüm Yuliä Timoşenko ğına çaqıra. Anıñ xäräkäte bu eşne inde beraz aşıqtırırğa da buldı, düşämbedä Yuliä Timoşenko berläşmäse deputatları Yuğarı Radadan üzläre teläp kitärgä äzer toruın belderde. Yuliä Timoşenko:

"Ukrainada kommunistik wä oligarxik xökümätne torğızu qurqınıçın istä totıp, häm prezidentqa ğädättän tış saylawlar iğlan itü öçen östämä mömkinleklär birü maqsatında bez parlament äğzaları wazifalarınnan waz kiçüebezne belderäbez", dide düşämbedä Yuliä Timoşenko.

Ägär dä Yuçenko sişämbedä Yuğarı Radanı taratmasa, ikençe möhim ber kön augustnıñ 2-sendä kiläçäk. Anda inde ul Yanukoviç yağı täqdim itkän premyer-ministr nämzäten xuplap, anı, älegä yazmışı bilgele bulmağan parlament qaramağına çığarırğa tieş bulaçaq.

Kärim Kamal
XS
SM
MD
LG