Accessibility links

Кайнар хәбәр

Piterbur uramınıñ bügenge xäle


Uzğan yıl Qazan üzeneñ meñyıllıq yubileyın görläp bäyräm itte. Älege tantanağa äzerlek uñayınnan başqalada törle tözü häm maturlaw eşläre başlanğan ide. Şul isäptän yañaça eşlänüçe Sankt-Peterburg uramı da Neva yılğasında urnaşqan şähärne xäterlätüçe urın bulıp tözelergä uylanıldı. Uram bügenge köndä ni xällärdä soñ?

Älegä Peterburg uramında tözeleş eşläre haman da däwam itä. Ämma peterburg stilennän tanış bulğan fonar'lar, üzençälekle arxitektura tözeleşe, matur küperçeklär uramda çınnan da Ton'yak başqala möxiten çağıldıra. Tik nigäder yaña uramda yörüçelär sanı azraq kürenä sıman. Ällä üz itmilär inde digän soraw da tuğan ide bezdä. Ällä tözeleş eşläre göreltese qomaçawlıymı? Ni genä bulsa da, sorawğa cawap tabu öçen, üzebez bu uramğa çığıp qararğa buldıq. Menä nilär äytä Qazan xalqı.

- Bu çınnan da, närsäder bar monda Peterbur äyberläre: bizäkläre, fonar'larımı şunda, brusçatkamı. Bar inde Peterburğa oxşağan nindider äyberlär.

- Min Peterburg uramında yörmim, çönki anda kafe da yuq… Küñelsez, tözelep betmägän.

- Bauman uramında şaw-şu, ä monda tınıçraq. Bu uram miña kübesençä çistalığı belän oşıy. Üssen, kiñäysen ide.

- Bu uram bik matur, bik qızıq itep yasalğan. Nu äzräk tözelep betkäç, bik matur bulır dip uylıym.

Çittän, Başqortstan, Mäskäw, Leninogorsk, Bua yaqlarınnan kilüçe qunaqlar da şaqtıy ide älege uramda. Alar närsä dip äytälär soñ?

Min Başqortstannan kildem. Bu uram nıq oşıy. Elektän dä bik matur uram ide ul. Xäzer tözeleş. Tözeleş waqıtında maturlıq bulamıni ul?! Öydä remont yasağan çağında da bik bolğawır bula. Bulır äkrenläp, bar da tözäler Alla birsä.

Bu uram bik matur, ul bezgä bik oşıy. Monda bar da avangard stilendä yasalğan. Bu streniälär dä betkäç, tağın da yämläner dip uylıym. Göllär dä utırtsalar bik yaxşı bulır ide.

Bik matur, älbättä, bik üzgärgän. Tözeleş eşläre dä tämamlansa, tağın da matur bulır äle.

Monda qızıq tügel, çönki monda kibetlär, kafelar da yuq. Min Bauman uramında yörim, anda küñelleräk.

Bu Peterburg uramı bezgä bik oşadı, bötenläy başqaça yasalğan. Bik matur. Äkiättäge kebek yasıylar.

Amerikadan biregä uqırğa kilgän Lyusiğa da Peterburg uramı bik xuş kilgän. Üze tatar telen dä öyränä ikän. Bezgä dä tatarça cawap birergä tırıştı ul.

Bu Peterburg uramı bik matur. Bauman uramına qarağanda qızıqlıraq. Miña bik oşıy.

Üzegez işettegez, xalıq törle fikerdä. Qazannıñ üzäk Bauman belän Peterburg uramnarı arasında nindider ber çağıştıru uzdırıluı da iğtibarğa layıq. Tik keşelärneñ kübese “uramnı oşatabız, bik matur” di bit. Anıñ Qazannıqınnan ayırmalı bularaq, bötenläy başqa ruxta tözelüen dä otıp alğan alar. Ä älegä göreldägän tözeleş eşläre genä uram tınıçlığın bozıp tora.

Güzäl Ziatdinova

XS
SM
MD
LG