Accessibility links

Кайнар хәбәр

Omski ölkäseneñ Tara şähäre 412 yıllığın bilgeläde


Dönyağa kilgän härber can iäseneñ tuğan köne bulğan kebek, här awılnıñ, rayonnıñ häm şähärneñ barlıqqa kilgän waqıtı - tuğan köne bar. Bu datanı bilgeläw, bäyräm oyıştıru soñğı yıllarda populyar bulıp kitte. Omski yağında da awıl yäki şähär könnären bilgeläw ğämälgä kerde diärgä bula. Şunısı da iğtibarğa layıq, bäyräm yasaw öçen datanıñ yubiley buluı da möhim tügel. Çirattağı şundıy bäyräm – şähär könen bilgeläw uzğan yäkşämbedä Tara rayonında oyıştırıldı. Anda Tara şähäreneñ 412 yıllığı bäyräm itelde. Töp tantana şähärneñ “Olimp” stadionında ütte. Bäyräm “Minem şähärem – minem ğailäm” digän isem astında bardı häm anda ğailä bäyrämneñ qäderle qunağı dip belderelde.

Bäyräm barışında ğailälärgä küp törle xörmät kürsätelde: altın tuyların bilgelägän parlarğa, küp balalı ğailälärgä, yort-cirläre ürnäk bulıp torğan xucalarğa büläklär birelde. Andıy ğailälärneñ urınnarı türdä - üzäk tribunada buldı. Xörmätkä iä buluçılar arasında, älbättä, bezneñ millättäşlärebez dä buldı: ürnäk bulırlıq ğailä tözegän Gölcihan apa belän Xämzä abıy Şaripovlar, yort-ciren tärtiptä totqan Kamaletdin Axmetov häm başqalar. Stadion qırında balalarnıñ, törle sänğät häm milli kollektivlarnıñ çığışları bardı. Rus, tatar, alman, latış, eston kollektivları üzläreneñ milli bäyrämnäre tamaşaların kürsättelär. Bu küreneşlär bäyrämne tağın da yämländerep, canlandırıp cibärde. Xalqıbıznıñ milli bäyräme Sabantuynı Tara şähäreneñ “Nur” häm “Yaqtaş”, Olı Uış awılınıñ “Rozalina”, “Duslıq”, “Qoyaş” häm “Sälam” kollektivları kürsätte. Kollektivlar üz bäyrämnären kürsätüdän tış, başqa millätlärneñ tamaşalarında da qatnaştılar.

Şähär köne bäyrämenä bıyıl ber yañalıq ta kertelgän ide. Ölkä qanunnar çığaru cıyılışı deputatı, Omskinıñ neft'' eşkärtü kombinat direktorı İldus Särvärov täqdime buyınça tantana barışında stadionda futbol uyını uynaldı. Tara şähäreneñ cıyılma komandası belän Omskinıñ neft'' eşkärtüçeläre arasında köç sınaşu bardı. Uyında İldus Särvärov üze dä qatnaştı, häm äytergä kiräk, anıñ komandası naçar uynamadı. Uyın Оmskilılarnıñ ciñüe belän tämamlandı. Şähär citäkçelege İldus Särvärovnıñ kiläçäktä dä şähär könendä futbol yarışları ütkärergä digän täqdimen xuplap, mondıy yarışlar ütkärüne traditsiägä äyländerergä wäğdä birde.

Tara şähärendä “Duslıq yortı” açıldı

Uzğan yal köne Omski ölkäseneñ Tara şähärendä milli oyışmalar xacätenä birelgän binanı - “Duslıq yortın” açu tantanası bulıp uzdı. Bu bina äle qayçan ğına ifrat tawşalğan xäldä ide. Biredä urnaşqan kitapxanäne yaña urınğa küçergännän soñ, rayon citäkçelege binanı milli oyışmalar xäcätenä birergä qarar qılıp, anı tözekländerüdä yärdäm sorap, eşmäkärlärgä, oyışmalar citäkçelärenä häm şähär xalqına möräcäğät itte. Yärdäm itüçelär tabılıp, qısqa waqıt eçendä bina tözekländerelde.

“Duslıq yortın” açu tantanasın rayon başlığı Pawel İsaev häm ölkä Qanunnar çığaru cıyılışı deputatı İldus Särvärov açıp cibärde. Şunsı da qızıqlı buldı, Pawel İsaev çığışın törle millät xalıqları telendä sälamläwdän başladı. Annan soñ qunaqlarnıñ häm törle milli kollektivlarnıñ çığışı başlandı. Qunaqlar ölkäneñ Tevriz, Azovo, Bol''şereç''ye, başqa rayonnarınnan Häm awıllarınnan kilgän idelär. Yıraqtan kilgän qunaqlar da buldı. Alar arasında Bobrovqa awılında Seber yağında yäşäwçe latış balaları öçen oyıştırılğan lager''ğa metodik yärdäm kürsätü maqsatı belän Latviädän kilgän Zidra xanım; 1933-1947 yıllarda repressiägä duçar bulıp Tara rayonına sörgengä cibärelgän, xäzerge köndä Çerkessiädä yäşäwçe Ğalim äfände Argunov ta buldılar. Üzläreneñ çığışlarında alar taralılarğa mondıy bäyrämnär oyıştırğannarı öçen räxmätle buluların belderdelär, “Duslıq yortında” şöğellänüçelärneñ uzara dus yäşäwlären telädelär.

“Duslıq yortı” citäkçese , alman mädäniät üzäge räise El''wira Gerasimova üzeneñ çığışında : “Biredä bez ber oyışmağa da kürsätmä birergä cıyınmıybız, barı tik metodik yärdäm genä kürsätäçäkbez”,- dide. Şunsı da qızıqlı ide, El''vira xanım onığın çığış yasarğa ezerläp, milli kiem saylarğa barğan. Näni qızğa tatar kieme oşağan. “Onığım andıy külmäk kiäm dip yul buyı yıladı”,- di, El''vira xanım.

Täbrikläwlär konsert nomerları belän ürelep bardı. Säxnädä bersen-berse alıştırıp rus, tatar, alman, latış, eston kollektivları çığış yasadı. Tatar kollektivlarınıñ därtle cırları, iyülläre tamaşaçılar küñelenä ayıruça bihuş kilde. Çığışlar tämamlanğannan soñ da xalıq taralırğa aşıqmadı. Bigräk tä tatarlar. Oçraşu forsatınnan faydalanıp alar cıyılıp cırlar cırladılar, aralaştılar, küñel açtılar

Şulay itep, Tara şähärendäge milli oyışmalar urınlı buldılar. Bu yort çın mäğnäsendä duslıq yortına äylänerme, ansın waqıt kürsäter.

Saniä Mirxaleeva. Omski

XS
SM
MD
LG