Accessibility links

Кайнар хәбәр

Çallıda millätçelär, kommunistlar piketı


Livan häm Fälästin cirlärendä barğan suğış xäräkätlärendä tuqtatu, turında söyläşülär barğan ber waqıtta Çallıdağı qayber firqä, oyışma äğzaläre piketqa çıqtılar. 14 avgustta, xakimiät binası qarşında ütkärelgän bu çarada Çallı TİÜ citäkçeläre häm äğzaläre, şulay uq kommunistlar, komsomollar cämğısı 20 artıq keşe qatnaştı. Piketqa alıp kilgän şiğar''lär arasında Amerika Quşma Ştatlarına, İzrail''gä qarşı, Çallı xoquq yaqlau orğannarın ğäyıpläp yazılğannarı da bar ide. Çallı militsiäseneñ, prokuraturasınıñ ni qatnaşı bar, digän soraw tuarğa mömkin. Bıyılnıñ iyül urtalarında San - Peterburda uzğan zur sigezlek sammitına qarşı oyıştırılğan aksiädä Çallıdan Kommunistik yäşlär Berlege äğzaläre dä qatnaşırğa tieş bula. Alarğa qarata törle ğayıplär belderelep, 5 iyüldä qulğa alınalar häm San - Peterburda ütkän qarşılıq aksiäsendä qatnaşa almıylar. Tağın soraw tua, ni öçen tatar milli xäräkäte wäkilläre kommunistlar häm komsomollar belän bergä uramğa çığalar? "Azatlıq" xäbärçese piket bulğan urında şuşı sorawlarğa mondıy cawap aldı. Aleksandr Yakuba: Kommunistik Yäşlär Bülege Çallıdağı citäkçese :

"Berençedän, bez, İzrail''neñ Livanğa, Fälästinğa qarata agressiäsen ğayıplibez. İkençedän, xoquq saqlaw oyışmalarınıñ bezgä qarata quyılğan ğämällärenä qarşı çıqtıq. Çönki, 5 iyül könne Tatarstanda, ğayıpläw belderelmägän kileş 5 keşe 10-12 täwlekkä räşätkä artına utırtıla. Bez xäzer şuşı yeget häm qızlarğa qarata mirovoy sud''ya Muksimov çığarğan qararnı kire aldıru öçen basıp torabız. Ul waqıtta şahitlar da bulmadı, advokatlar çaqırtığız digän taläplär dä ütälmäde.

Aldağı äñgämädäşem Aygöl Äxmätcanova, ul,San - Peterburg qarşılıq aksiäsendä qatnaşası urında, şulay uq 5 iyül könendä törmägä elägä:

"Ägär keşene şähärdän kitü teläge bulğan öçen genä räşätkä artına utırtalar ikän, monı añlatuı qıyın. Bezne qulğa alunıñ ikençe könendä genä, qulğa alu turında belderü yasadılar. Mäxkämä eşe beryaqlı ğına buldı häm bezneñ dälillärneñ küplegen sıltaw itep, alarnı iğtibarğa da almadılar, bezgä süz dä birmädelär". Bu - Aygöl Äxmätcanova fikerläre buldı. Çallı TİÜ räise Räfis Kaşapov äytüençä, piketqa xalıq küp çığarğa tieş bula. Läkin, suğış tuqtaldı, tınıçsızlıq kileşüläre tözelä digän süz taralğaç, keşelärneñ ber öleşe piketqa kilmi. Suğış axırğaça betmi torıp bezneñ taläplär üz köçendä qalaçaq, dide ul.

İnde, kommunistlar, komsomol yäşlär belän bergä piket oyıştıru turındağı sorawğa cawapnı işetik:

"Äye, zamanında kommunistlar mäçet häm çirkäwlärne cimerdelär, dinne, telne beterdelär. Läkin Livan häm Fälästin mäsäläsen Rusiädä G.Zyuganov citäkçelegendäge kommunistlar ğına kütärä. Bu oçraqta bezneñ fikerlär turı kilde.

Çallı, Ğafiulla Ğaziz

XS
SM
MD
LG